„Вештачката интелигенција може да ја скалира содржината, но не може да почувствува“: Експертите во Кан за тоа како да се зачува креативноста во ерата на "AI"

Креативната индустрија ќе претрпи големи промени со развојот на генеративната вештачка интелигенција, истакна Мустафа Сулејман, извршен директор за "AI" во Microsoft.

„Развојот на "AI" ќе доведе до значително намалување на трошоците за продукција на содржини и ќе ја преплави дигиталната сцена со бескрајни текови од генериран материјал. Тоа ќе биде нов предизвик за брендовите кои ќе се прашуваат – како да се издвојат од масата слични содржини? Стандардот на квалитет ќе достигне нови височини, што ќе се одрази и врз ПР-от, кој ќе мора да се издигне на повисоко ниво во создавање прецизни и длабоко човечки приказни“, рече Сулејман на панелот „Вештачка интелигенција и иднината на креативноста“.

На фестивалот во Кан, водечки светски експерти се согласија во едно: креативноста денес мора да се темели на емпатија, искуство и автентичност. Како што истакна Ричард Еделман, извршен директор на агенцијата "Edelman", последниве години сме сведоци на нестабилност – инфлација, технолошки пресврти и општа загуба на доверба во институциите. Во таков контекст, сè повеќе луѓе – особено младите – се врзуваат за брендовите не само поради производите, туку поради смисла, стабилност и чувство на припадност.

„Во свет во кој дури 70% од припадниците на Gen Z веруваат дека медиумите не ја зборуваат вистината, а половина од нив прескокнуваат оброци за да состават крај со крај, брендовите стануваат не само економски чинители, туку и емотивни столбови. Денес, брендовите се најдоверливите институции во општеството, а одговорноста за таа доверба ја носи ПР-от. Луѓето не бараат само производи – туку нешто во што можат да веруваат. Оваа еволуција ја става комуникацијата во прв план“, рече Еделман, првиот човек на глобалната агенција "Edelman", специјализирана за односи со јавност и комуникациски услуги.

Претставници на агенцијата "New Media Team", специјализирана за интегрирани комуникации, годинава внимателно ги следеа сите предавања во Кан и најавените промени во светот на комуникацијата и креативноста. Ова беше и можност за интервјуа со истакнати говорници, чии размислувања ќе бидат објавени во првото издание на "New Media Team", кое ќе се промовира на Меѓународниот саем на книгата во Белград во втората половина на октомври. Станува збор за книга наменета за професионалци, но и за сите кои ги интересираат комуникациите од аспект на стратегија, креативност, големи идеи и најдобрите практики од глобалната индустрија.

Како што се слушна на фестивалот, вештачката интелигенција прави голем скок секои два месеци. Тоа значи дека моделите што ги користиме денес, за само една година ќе бидат дури 600 пати помоќни.

„Цврсто верувам дека во следните три години, скоро без сомнение, ќе влеземе во ерата на супериорна вештачка интелигенција, и мислам дека нејзините последици врз светот и работата на компаниите ќе бидат длабоки. Затоа, како бренд, мора да имате визија што инспирира – и за да ги привлечете најдобрите вработени, и за да изградите силна база на потрошувачи. Вашата визија не мора да биде политичка. Секој бренд треба да биде свесен и одговорен, но без компромис околу основните вредности и долгорочната визија“, изјави Ден Шулман, поранешен претседател на "PayPal" и актуелен член на бордот на "JUST Capital".

Предавањата во Кан покажаа дека пристапот кон вештачката интелигенција – односно кон истите податоци и иста технологија – ќе биде ист за сите. Но, единствената вистинска разлика ќе биде креативноста. А таа, порачаа експертите, мора да доаѓа од животот, не од алгоритам.

„Вештачката интелигенција може да ја скалира содржината, но не може да почувствува – заклучи Мустафа Сулејман и потенцираше дека емоционалната интелигенција останува човечка територија.