„Apple“ со години уживаше во својата зона на комфор, остварувајќи огромни приходи од продажбата на „iPhone“ и друг хардвер, како и преку дигиталните сервиси како „iCloud“, „Apple Music“, видеоплатформи и други. Но, по појавата на „ChatGPT“ од „OpenAI“, „Apple“ изгледа беше изместен од таа зона – со оглед на тоа што станува збор за револуционерна технологија која ветува да го промени начинот на кој живееме и работиме, додека „Apple“ значително заостанува во развојот на вакви решенија.

За тешкотиите на „Apple“ во развојот на вештачка интелигенција („AI“) и нејзина интеграција во сопствените уреди веќе се зборува, а на тој основ може да се заклучи дека компанијата се соочува со големи предизвици. Имајќи предвид дека самостојно можеби нема да успее да ги надмине тие пречки – или барем недоволно брзо – раководството почнало да разгледува опции како да го намали заостанувањето зад конкуренцијата.

Една од тие опции изгледа прилично скапа, но и мошне интересна: аквизиција на „Perplexity AI“, иновативна „AI“-компанија чии алатки веќе се сметаат за можен заменик за класичното пребарување на интернет. Според „Bloomberg“, Едријан Перика, шефот на секторот за спојувања и аквизиции во „Apple“, веќе разговарал со Еди Кју, еден од потпретседателите на компанијата, како и со други високи функционери, но засега нема конечна одлука.

Покрај аквизиција, „Apple“ размислува и за стратешка соработка со „Perplexity“, при што технологијата на компанијата би можела да се интегрира во „Safari“ или во „Siri“, со што „Apple“ би добил вештачки интелигентен пребарувач базиран на „chatbot“ архитектура.

Интерес покажала и „Meta“

Доколку дојде до аквизиција, тимот на „Perplexity AI“ би се придружил на „Apple“, што би значело значително јакнење на внатрешните капацитети за развој и тренирање на „AI“-модели.

Во меѓувреме, според „Gizmodo“, покрај „Apple“, за „Perplexity“ интерес пројавила и „Meta“, компанијата на Марк Закерберг, која веќе има значителен напредок во „AI“ и би можела дополнително да го зајакне својот развој со интеграција на „Perplexity“ технологијата.

Додека „Apple“ сè уште го користи „Google“ како стандарден пребарувач во „Safari“, за што годишно плаќа милијарди долари, тоа партнерство е под регулаторен притисок и се соочува со судски спорови. Доколку тој договор биде принудно прекинат, партнерство со „Perplexity“ може да биде логичен чекор.

Некои аналитичари „Perplexity“ веќе го нарекуваат „убиецот на Google“, бидејќи нивниот „chatbot“, слично како „ChatGPT“, овозможува корисниците да постават прашање и веднаш добијат одговор, без потреба од класично пребарување преку линкови.

Со вакви технологии на повидок, „Apple“ се обидува да го фати чекорот со „AI“ револуцијата – прашање е само дали ќе го направи тоа преку купување, соработка или сопствен развој.