Некои од тие наслови можеби се и подобри од содржината која денес ни се нуди секојдневно. Порталот „Collider“ се потсети на незаборавните хитови од 90-тите, серии кои со својот оригинален пристап оставиле траен впечаток и помогнале да се обликува телевизијата каква што ја познаваме денес.

Пријатели (1994 – 2004)

Оваа серија за шестмина пријатели од Њујорк го освои светот со едноставната приказна – секојдневниот живот, љубовите и пријателствата. Малку серии оставиле толку силен белег во поп-културата. „Пријатели“ станаа симбол на една генерација.

Благодарение на непрестаните репризи и достапноста на стриминг сервисите, серијата и понатаму собира нови гледачи, а нејзиното влијание е видливо и во денешните ситкоми. Иако денес се поставува прашањето за недостаток на разновидност во актерската поставеност, „Пријатели“ го поставија темелот за многу серии кои следеа.

Третиот камен од Сонцето (1996 – 2001)

Научно-фантастичната комедија за вонземјаните кои се обидуваат да го разберат животот на Земјата била свежа и оригинална. Серијата се истакнувала со интелигентен хумор, но и со одличната актерска екипа предводена од Џон Литгоу. Денес ваквите жанровски комбинации се реткост, поради што многумина со носталгија се сеќаваат на семејството Соломон.

Бивис и Бат-Хед (1993 – 1997)

Пред „Саут Парк“, анимираниот свет го провоцираа Бивис и Бат-Хед. Двајца не баш паметни тинејџери станаа симбол на бунтовништвото во 90-тите. Иако контроверзна, серијата знаеше да го погоди духот на времето и да покаже што се случува кога општеството престане да се занимава со младите. И покрај бројните обиди за враќање, оригиналната верзија сè уште има посебен статус меѓу гледачите.

Апсолутно фантастично (1992 – 2004)

Британската серија за две непоправливи модни зависнички, Едина и Пејси, беше сè освен политички коректна. Џенифер Сондерс и Џоана Ламли создадоа два лика кои го редефинираа поимот женска комедија. Нивната дрскост и апсурдниот хумор и денес се пример, а така храбри протагонисти тешко се наоѓаат во современите серии.

Вистинскиот свет (1992 – 2019)

Оваа емисија на MTV беше претходник на современите реалити програми. Седум млади луѓе живееја под ист покрив, а камерите ги бележеа нивните конфликти, љубови и секојдневие. „Вистинскиот свет“ отворено ги прикажуваше теми како СИДА, зависности и дискриминација, што ја правеше исклучително важна во своето време.

Бафи, убиец на вампири (1997 – 2003)

Сара Мишел Гелар ја толкуваше Бафи, средношколка која преку ден оди на настава, а ноќе убива вампири. Серијата ја споила драмата на созревање со натприродниот жанр и инспирираше бројни наслови кои следуваа подоцна. Бафи стана симбол на силна, но ранлива тинејџерка и останува една од најважните телевизиски хероини.

Дадилка (1993 – 1999)

Фран Фајн беше необична дадилка со неодолив акцент и уште поимпресивен моден израз. „Дадилка“ беше класичен ситком, полн со хумор, шарм и незаборавни реплики. Иако денес можеби би се сметала за старомодна, серијата остана во срцата на гледачите поради харизматичната Фран Дрешер.

Досиејата Икс (1993 – 2018)

Паранормални појави, теории на заговор и необични случаи беа заштитен знак на „Досијата Икс“. ФБИ агентите Малдер и Скали станаа еден од најпознатите телевизиски двојки. Серијата успеа да го спои науката, мистиката и личната драма, оставајќи силно влијание врз СФ продукцијата која следеше.

Сеинфелд (1989 – 1998)

Серијата за „ништо“ беше сè, освен досадна. Џери, Џорџ, Елејн и Крејмер живееја во Њујорк и на неповторлив начин коментираа ситниците од секојдневниот живот. Хуморот беше саркастичен, малку циничен, но исто така и исклучително прониклив. „Сеинфелд“ остави траен белег во комедијата и поп-културата.

Твин Пикс (1990 – 2017)

Дејвид Линч создаде нешто што телевизијата претходно не го видела. „Твин Пикс“ беше мистериозна, надреална и често збунувачка, но токму поради тоа посебна. Приказната за убиството на Лора Палмер се претвори во длабоко симболична серија која и денес има статус на култен класик. Нејзината атмосфера и стил сè уште се неспоредливи.