Да се претвори скромно комби во возило кое привлекува погледи бара визија – а ни малку носталгија никогаш не е на одмет.

Италијанскиот производител на каросерии „Caselani“ повеќепати покажа дека и практичните возила можат да носат винтиџ стил подеднакво добро како и класичните купеа.

Нивниот најнов проект го враќа духот на „Fiat 616 N“ од шеесеттите години, но сега на модерна основа – „Fiat Ducato“.

Носталгија сред функционалност

Трансформацијата е многу подлабока од само надворешниот изглед – екстериерот на „Ducato“ е целосно редизајниран за да го пренесе шармот на својот претходник од средината на 20. век.

Дизајнот го потпишува Давид Обендорфер, кој го стилтизираше и претходното ретро-портфолио на „Caselani“ инспирирано од „Citroën“, вклучувајќи ги моделите „Jumper“, „Spacetourer“, „Berlingo“ и „Ami“.

Класичните детали го дефинираат преработениот 616N: кружни предни и задни светла, хауба во ретро стил и закривени линии.

Овие форми потсетуваат на оригиналите – „Fiat 615“ и „616“ комбија од педесеттите и шеесеттите години.

Горниот дел на каросеријата, кровот и кабината остануваат речиси непроменети од основниот „Ducato“, но хармонично се спојуваат со редизајнираните панели.

Внатрешноста, како и механичката основа, се задржани од базичното возило.

Разновидни конфигурации

„Caselani“ објави рендери и кратко видео од првите два примерока, конфигурирани како кампери. Сепак, конверзискиот пакет нема да биде ограничен само на кампер верзии. Ќе бидат достапни и комбија, фургони и шлеп-возила, секое со свои модификации.

Купувачите ќе можат да изберат меѓу девет еднобојни и три двобојни комбинации на екстериер, нудејќи голема флексибилност во персонализацијата.

Под хаубата се наоѓа 2.2-литарски „Multijet“ турбодизел мотор, достапен во три изведби – 120, 140 и 180 коњски сили.

За љубителите на електрификација, компатибилна е и целосно електричната верзија „Fiat E-Ducato“. Таа нуди 268 коњски сили преку еден електромотор, со поддршка на масивна батерија од 110 kWh.

Иако „Fiat Ducato“ е најпогодна основа, пакетот најверојатно ќе биде компатибилен и со неговите „браќа“ – „Citroën Jumper“, „Peugeot Boxer“, „Opel Movano“, „Toyota ProAce Max“, „Iveco Super Jolly“ и „Ram ProMaster“.

Овие комбија ја делат истата основа, внатрешност и панели на каросеријата, со различни маски на ладилникот и амблеми.

Премиера на големата сцена

„Caselani 616 N“ својата јавна премиера ќе ја има на саемот „Caravan Salon 2025“ во Дизелдорф на 29 август.

Цените сè уште не се објавени, но моделот веќе е достапен на официјалната веб-страница на италијанскиот каросерист.