„BMW Individual“ беше основан во 1991 година како посебна дивизија на „M GmbH“ со цел да го предводи трендот на поголема индивидуалност, фокусирајќи се на клиенти кои бараат решенија по мерка и поставуваат повисоки барања во однос на дизајн, функција и ексклузивност. Приказната за успех започна со дизајн на Карл Лагерфелд за моделот E32 7 Series, по што следуваа уште две негови визии во наредните години.
Но, токму „BMW L7 by Karl Lagerfeld“ засекогаш ќе остане запишан во историјата. Карл Лагерфелд, еден од најиконските модни дизајнери на 20. и 21. век, ја пренесе својата филозофија за луксуз и современост врз моделот "E38 BMW 7 Series". "L7" претставува издолжена верзија на „седмицата“, со вкупна должина од 131 инч – 10 инчи подолга од моделот "750iL" со долга меѓуосовина.
"E38 L7", произведен во 2000 година во ограничена серија од само 899 примероци, доби уникатна комбинација од "Chestnut Brown Metallic" и "Gold Orange Metallic" надворешна боја. Внатрешноста на „Lagerfeld L7“ е обвиена во кожа во нијанса "Chocolate Brown", дополнета со портокалови контрастни шевови кои ја нагласуваат ексклузивноста. Луксузниот инфо-забавен и комуникациски систем во задниот дел – врв на технологијата во тоа време – вклучуваше телефон, факс уред, VHS плеер, фрижидер или, како во случајот на „Lagerfeld L7“, мал сеф. За поголема приватност, меѓу предните и задните седишта беше поставено стакло со тешки завеси. На дрвената врата беше поставена специјална ознака „Designed by Karl Lagerfeld“, изведена во злато.
Под хаубата, "E38 L7" беше опремен со 5.4-литарски V12 мотор со 240 kW/326 коњски сили и 490 њутн-метри вртежен момент. Иако тежеше 2,2 тони, ултра-луксузната лимузина достигнуваше од 0 до 100 km/h за 7 секунди. "L7" се сметаше за врвот на понудата од генерацијата "E38" – наменет за клиенти со исклучително високи стандарди во секој сегмент: од удобност и возачко искуство, до најсовремена технологија и раскош на секое ниво.
