Љубителите на автомобили и новинарите често се жалат на зголемувањето на димензиите (но и цените) на автомобилите.
Современите возила се значително поголеми и потешки отколку пред неколку децении, а добар дел од таа дополнителна маса ја диктираат безбедносните прописи.
Сепак, многу е поголема веројатноста дека ќе преживеете челен судир во модерен автомобил отколку во еквивалентен модел произведен пред 20 – 30 години. Овој нов „краш“ тест на стариот „Volkswagen“ е отрезнувачки потсетник на тоа колку е напредната автомобилската безбедност, пишува „Motor1“.
„Dekra“, независна организација за безбедност на автомобили основана во Берлин во 1925 година, ја подложи втората генерација на „Golf“ на ригорозен модерен тест за судир.
Целта беше да се прикаже колку напреднала безбедноста на автомобилите преку споредба на хечбек од 1989 година со неговиот денешен наследник – осмата генерација од 2024 година.
За овој необичен тест, германската организација за тестирање, инспекција и сертификација успеа да обезбеди 36 години стар автомобил во одлична техничка состојба.
Во својот центар за „краш“ тестови во Нојминстер, „Dekra“ го удри „Golf II“ во бариера со брзина од 60 км/ч, симулирајќи процедура за челен судир која „EuroNCAP“ ја користеше до 2020 година.
Бариерата беше опремена со деформациски елемент за да се имитира апсорпцијата на енергија од возило што доаѓа од спротивна насока.
Под овие услови, тестот го репродуцираше челниот судир меѓу два идентични автомобили кои се движат со брзина од 50 – 55 км/ч.
Како да не беа доволни вознемирувачките фотографии по судирот, експерт на „Dekra“ ги сумираше резултатите:
„Во Golf II патниците би имале мали шанси да преживеат ваков челен судир поради уривање на патничкиот простор, длабоко продирање на компонентите на возилото во кабината, нагло забавување на телото и удар во воланот.“
Исходот беше сосема различен за „Golf VIII“ тестиран под идентични услови, при што патниците веројатно би поминале само со полесни повреди:
„Целата патничка кабина остана целосно недопрена, а патниците беа многу добро заштитени со предни и странични воздушни перничиња во комбинација со безбедносните појаси, затегнувачите и ограничувачите на силата на појасот.“
„Dekra“ не застана само на тестот за судир на „Golf“ од 1989 година. Тестовите за сопирање открија дека на осмата генерација ѝ бил потребен околу 30% пократок пат за целосно запирање.
Стабилноста во свиоци исто така беше проверена преку маневар, при што модерниот „VW“ безбедно го заврши тестот при 75 км/ч, додека неговиот претходник од 1989 година успеваше само до 65 км/ч.
Разликите се протегаа и на други полиња. На пример, стандардните LED светла на новиот автомобил се покажаа како неспоредливо подобри во однос на халогените сијалици на неговиот претходник.
Позади, LED стоп-светлата ја подобрија видливоста за возачите одзади, дополнително унапредена со трето стоп-светло, кое недостасуваше кај моделот од 1989 година.
Треба да се напомене дека третото стоп-светло не беше задолжително во Европа сè до доцните деведесетти, иако некои автомобили и претходно го имаа.
