Кога падна Берлинскиот ѕид, масовно ја преминуваа границата – автомобилите од марките „Trabant“, „Wartburg“ и други возила од Источна Германија. Многу жители на поранешната држава не можеа доволно брзо да се ослободат од овие едноставни „социјалистички“ автомобили со двотактен мотор. Желбата за современи возила од Западот беше преголема. Но 35 години по исчезнувањето на "ДДР", автомобилите од таа поранешна земја повторно добиваат на вредност – овој пат како олдтајмери.
За еден „Trabant 601“ во беспрекорна оригинална состојба, колекционерите денес плаќаат и до 7.000 евра – повеќе од двојно во однос на 2018 година, според податоците на компанијата „Classic Data“.
Оваа фирма од Бохум е специјализирана за процена на вредноста на олдтајмерите на пазарот.
За „Wartburg 353“ во лимузинска верзија, во врвна состојба, денес треба да се издвојат речиси 10.000 евра. И овој модел за седум години – во зависност од состојбата – најмалку ја удвоил својата вредност.
Двојно е зголемена и цената на „Wartburg 311“ во стандардна форма со четири врати. За примерок во топ состојба може да се добијат околу 16.600 евра, а особено ретките купе-верзии достигнуваат речиси 35.000 евра.
Уште поскапи се моделите „EMW 327“. Станува збор за кабриолети и купеа што се произведувале во ограничени серии.
Тие денес вредат речиси колку и истоимениот модел на „BMW“, кој во Ајзенах се произведувал до 1941 година. За примероци во најдобра состојба, колекционерите плаќаат повеќе од 100.000 евра.
Тоа ги изненадува дури и признати експерти, како што е специјалистот за олдтајмери Вајт Кол.
„Ретко кое возило добило толку на вредност“, вели Кол. „Повеќето автомобили од ДДР и денес се ’препродаваат‘ во источниот дел на земјата“, додава тој.
За многу колекционери, овие автомобили веќе стекнале култен статус.
„Големо внимание се посветува на состојбата на возилото. Најважно е да биде што е можно поблиску до првобитната состојба и да има целосна документација“, објаснува Кол.
Сепак, тој не верува дека растот на вредноста ќе продолжи со ова темпо. Само одредени ретки модели секогаш ќе се ценат високо.
Минатата година беа регистрирани околу 8.900 возила произведени во фабриката во Ајзенах, главно „Wartburg“-и, а околу половина од сопствениците имаа повеќе од 60 години, според податоците на Сојузната управа за моторни возила (KBA).
„Trabant“ има далеку повеќе. Според "KBA", во 2024 година на германските патишта сè уште сообраќале околу 40.800 возила од фабриката „Zaksenring“.
Повеќе од половина од сопствениците на „Trabant“ се помлади од 60 години, а околу 2.800 дури се помлади од 30. Тоа значи дека се родени откако последниот „Trabant“ излезе од производната лента во Цвикау во 1991 година, пренесува „b92“.
