Според достапните информации, Орберг работел цели две години на ова возило. "Eldorado" бил преполовен и продолжен со рамка во форма на гитарска, а задниот дел бил драстично преработен за да личи на тело од гитара, со додадени перки инспирирани од млазни авиони.

"Cadillac Eldorado" од 1970 со 8.2-литарски "V8" мотор

Основата на овој уникат бил "Cadillac Eldorado" од 1970 година, опремен со моќен 8.2-литарски "V8" мотор – познат како "Cadillac 500 V8". Моторот развивал 400 коњски сили и 746 Nm вртежен момент – доволно за да придвижи автомобил тежок 2130 килограми.

Во тоа време, единствената достапна трансмисија била тристепен автоматик, способна да издржи голем вртежен момент. Купувачите можеле да изберат меѓу 7.0 и 7.7-литарски V8 мотори, но ниту една верзија не нудела помал мотор.

Човекот зад најдолгиот автомобил на светот

Џеј Орберг денес е најпознат по "Panthermobile" – спектакуларното, силно розево возило што го изработи во 1969 година за цртаниот серијал "The Pink Panther Show". Неговото портфолио вклучува и иконични возила како "KITT" од филмот "Knight Rider 2000", автомобилот од "The Flinstones", па дури и "Piano Car" – пијано што можело да се свири додека се вози.

Во 1986 година стана светски познат кога го претстави "The American Dream" – лимузина долга 30 метри со 26 тркала, хелиодром, базен со штица за скокање, џакузи и воден кревет во природна големина. Гинисовата книга на рекорди го признала како најдолг автомобил на светот.

Заборавениот „Guitar Car“ на Елвис

И покрај славата на својот сопственик и креатор, малку се знае за "Guitar Car" на Елвис. Со текот на времето, возилото било заборавено и оставено.

Денес се наоѓа во Орлеан, Франција, и не е познато како завршило во Европа.

Орберг и неговиот тим го преполовиле "Eldorado" веднаш зад А-столбот (помеѓу шофершајбната и предната врата), а предниот и задниот дел ги споиле со челична рамка од квадратни цевки. Задниот дел е оформен во форма на гитара, а каросеријата – вклучувајќи и големите перки – е изработена претежно од фиберглас.

Во оригиналната верзија автомобилот имал лажни механизми за штимување, жици, гриф и седиште поставено таму каде што на вистинска гитара се наоѓа отворот за звукот или "pickup"-от.

На "eBay" се продава за „само“ 10.000 евра

Елвис беше познат по својата љубов кон "Cadillac" возилата – често ги подаруваше на пријатели, фанови и дури и на случајни познаници. Со овој автомобил стигна со голем публицитет на концерт во Лас Вегас, дополнително зацврстувајќи го имиџот на екстравагантниот крал.

Денес автомобилот се нуди на продажба на "eBay" како неупотребливо возило. Фотографиите покажуваат дека му е потребна целосна реставрација, но за вистинските ентузијасти ова може да биде вреден и единствен проект – особено со почетна цена од „само“ 10.000 евра.