Моделот "Maextro S800" чини помалку од "Mercedes-Maybach S" класата, а очигледно е инспириран од неа.
Оваа луксузна лимузина ќе биде понудена во верзии со целосно електричен погон и како електрично возило со продолжен досег (range-extender).
"Huawei" минатата година го претстави "Maextro S800", а сега за првпат го открива и неговиот ултралуксузен ентериер.
Не изненадува фактот што дизајнот е силно инспириран од моделите на "Mercedes-Maybach" и "Rolls-Royce".
Возачот седи зад елегантен двобоен волан и гледа во „лебдечки“ екран кој многу потсетува на "MBUX Hyperscreen" на "Mercedes".
Иако точните димензии не се наведени, за споредба, "Mercedes EQS" располага со 12,3-инчна дигитална инструмент-табла, 17,7-инчен инфотејнмент систем и 12,3-инчен екран за совозачот – сето тоа поврзано во една целина.
Дизајнерски елементи на "Mercedes" се препознаваат и на други места. Металните решетки на звучниците наликуваат на "Burmester" системот, а на вратите се поставени контроли за прилагодување на седиштата, слични на оние кај "Mercedes".
Дополнително, присутни се дигитални екрани кои (во комбинација со надворешните камери) ги заменуваат класичните ретровизори, потоа два безжични полначи за телефони и дрвени елементи на централната конзола.
Дизајнерите додале и елегантен ротациски "контролер", како и метални детали, а купувачите ќе уживаат во луксузна комбинација на кожа и алкантара.
Сепак, вистинската ѕвезда на ентериерот е задниот дел резервиран за патниците. Таму се наоѓаат две одделни седишта со електрично прилагодување и потпирач за нозе.
Предното совозачко седиште може да се помести нанапред за да се овозможи уште поголем простор за удобно патување.
Седиштата се разделени со елегантна кожно-дрвена конзола која содржи склопливи масички, држач за чаши за шампањ и фиока. Се очекува и вграден фрижидер, како и забавен систем за патниците на задните седишта.
Над патниците е поставен покрив со „ѕвездено“ осветлување, инспириран од "Rolls-Royce", а на вратите се поставени екрани слични на оние од "BMW Серија 7".
Овој луксузен модел ќе биде лансиран подоцна годинава и ќе биде долг 5.480 мм, со меѓуоскино растојание од 3.370 мм.
Со тоа, "Maextro S800" е 10 мм подолг од "Mercedes-Maybach S" класата, но со меѓуоскино растојание пократко за 25 мм.
Според информациите на порталот "CarNewsChina", "Maextro S800" ќе биде достапен со електричен погон и батерија со капацитет од 94,4 kWh, што треба да обезбеди досег од 670 до 702 километри според кинескиот "CLTC" стандард.
Планирана е и верзија со продолжен досег, со помала батерија од 63,3 kWh, која ќе нуди досег од 258 до 311 километри во целосно електричен режим.
Почетната цена наводно ќе изнесува еден милион јуани, односно околу 120.000 евра. Тоа е значително поповолно во споредба со цената на моделот "Mercedes-Maybach S480" во Кина, кој започнува од 1,48 милиони јуани (околу 180.000 евра).
