"Renault 5 Turbo 3E" е целосно електричен „мини суперавтомобил“ инспириран од легендарните модели "Renault 5 Turbo" и "Turbo 2" од осумдесеттите години, комбинирајќи впечатлив ретро дизајн со врвни перформанси.

Од вторник, 22 април во 9 часот по средноевропско време, заинтересираните купувачи ќе можат да резервираат еден од 1.980 нумерирани примероци што ќе бидат произведени. За резервација е потребна аконтација од 50.000 евра, по што купувачите ќе можат да закажат состанок со локален дилер за финализирање на постапката.

Оваа авансна уплата обезбедува место во редот кога "Renault 5 Turbo 3E" ќе стане достапен за купување. Првите купувачи ќе имаат можност да го изберат и серискиот број на својот автомобил од ограничената серија.

Цената и продажбата

Почетната цена за овој возбудлив електричен автомобил изнесува 155.000 евра со вклучен ДДВ, но оваа цена важи само за првите 500 купувачи кои ќе направат приоритетна резервација преку мрежата на "Renault" дилери во Европа (вклучувајќи ја Велика Британија), Блискиот Исток, Јапонија и Австралија. Цената не вклучува дополнителни опции, додатоци или персонализација.

"Renault" ги вклучува и своите дилери во предфинансирање на развојот на моделот "5 Turbo 3E", при што и тие, како и купувачите, ќе вложат средства однапред. Овој заеднички пристап овозможува финализирање на развојната фаза.

На почетокот од 2026 година, дилерите ќе ги контактираат купувачите со направена резервација за да го започнат процесот на персонализација.

Персонализација и достапни опции

Покрај класичните бои инспирирани од историјата на моделот – како црвената кај сериските возила или црно-жолто-белата кај рели верзијата – ќе бидат достапни и нови опции. Купувачите ќе можат директно да соработуваат со дизајнерите на "Renault" и да го креираат сопствениот изглед на екстериерот и ентериерот, избирајќи бои и материјали за сè – од седиштата до командната табла.

Конечните конфигурации и нарачки ќе бидат финализирани во првата половина на 2027 година, а депозитот ќе биде одбиен од крајната цена.

Првите испораки на овие рачно составени електрични автомобили се очекуваат на крајот од 2027 година.

Технички карактеристики и перформанси

"Renault 5 Turbo 3E" е изграден врз специјално дизајнирана алуминиумска платформа која овозможува високи перформанси и нема никаква сличност со серискиот електричен модел "Renault 5".

Автомобилот е долг 4,08 метри, широк 2,03 метри и висок 1,38 метри. Оваа комбинација го позиционира како нова категорија возило – „мини суперавтомобил“, велат од "Renault".

Моделот има два електромотора поставени во задните тркала, со што добива погон на задни тркала. Моторите произведуваат вкупно 540 коњски сили и импресивни 4.800 Nm вртежен момент (на тркалата), што овозможува забрзување од 0 до 100 km/h за помалку од 3,5 секунди.

Благодарение на карбонската каросерија, тежината е под 1.450 килограми. Возилото има батерија од 70 kWh и 800-волтна електрична архитектура, што овозможува брзо полнење со моќност до 350 kW. Батеријата може да се наполни од 15% до 80% за само 15 минути, а дометот според "WLTP" стандардот надминува 400 километри.

По почетниот период на резервации, "Renault 5 Turbo 3E" ќе биде изложен во новите "RNLT" продавници во поголемите европски градови и во Ријад, а потоа ќе биде претставен и на манифестацијата "Goodwood Festival of Speed" во јули 2025 година.