Експлодираше побарувачката за луксузно сместување од „Белиот лотос“: „Плаќаат неверојатни 11.000 долари за апартмани, не прашуваат за цена“

Можеби ќе помислите дека луксузното сместување прикажано во телевизиска серија што вклучува предавства, многу секс, барем едно мртво тело и домаќини на ултра богати гости, познати по тоа што се апсолутно најлоши, нема да биде привлечен избор за вистински одмор. Сепак, во случајот со ТВ серијата „White Lotus“ и Four Seasons Hotels & Resorts во Тајланд, спротивното е точно – нивниот бизнис цвета како никогаш досега.

Како што објави „Фајненшл пост“, неколку хотели „Четири сезони“ во Тајланд, дури и оние кои не учествувале во снимањето на новата сезона на популарната HBO серија, забележуваат зголемен број гости кои трошат огромни суми само за да го почувствуваат духот на „Белиот лотос“.

„Бев изненаден кога ја видов првата епизода“, вели Џеј Џеј Аси, генерален менаџер на „Four Seasons Koh Samui“, каде што беше снимен голем дел од третата сезона на серијата. Четири дена по премиерата, Аси тврди дека веќе имале три групи гости кои во последен момент побарале сместување со три спални соби, како оние што се гледаат во првите две епизоди.

Цените за ваквите сместувања започнуваат од 10.000 американски долари за ноќ, вклучуваат лични батлери, приватни базени и нудат вистинско мало одморалиште во рамките на самото одморалиште. Замокот во кој престојува семејството Ратлиф во серијата е уште полуксузен во реалниот живот. Истото важи и за вилата во која престојуваат тројцата пријатели, иако, како што напоменува Аси, „Во реалноста, мајмуни не шетаат во дворот на вилата – тоа секогаш мораме да им го објасниме на нашите гости.“

Откако серијата беше премиерно прикажана на HBO на 16 февруари, Аси организираше ексклузивна забава покрај главниот базен во одморалиштето, каде што ликот на Патрик Шварценегер во серијата неуспешно се обидува да заведе жени. „Гледањето на нашиот хотел со таква кинематографска грандиозност беше едноставно фантастично“, вели Аси.

Иако во првите минути од серијата се слуша пукање, тоа не го загрижило него и неговиот персонал. „Видете, тоа воопшто не ни пречеше. Сите разбираме дека „Белиот лотос“ е театарска, измислена драма. Ако сте ја гледале првата сезона во Мауи или втората во Таормина, тогаш знаете како функционира ова“, објаснува тој.

Одморалиштето, кое има 71 соба и луксузни апартмани, моментално работи со речиси 100% исполнетост, во споредба со вообичаените 80-90% во истиот период од годината. Извршниот директор на Four Seasons, Алехандро Рејнал, претходно изјави за Блумберг дека на неговите хотели не им е потребен дополнителен маркетинг, но сепак, резервациите и пребарувањата на Google значително се зголемиле по премиерата на третата сезона.

„Имаме гостин кој утре ја поминува последната вечер со нас и ми рече: ‘Сакам да ја поминам во таа луксузна резиденција. Не ми е гајле колку чини, само сакам да бидам таму.’ И тоа не е изолиран случај“, открива Аси за „Фајненшл пост“.

Ова значително се одразило на приходите на хотелите. „Одеднаш, гости кои првично резервираа соби од 2.000 или 3.000 долари за ноќ, почнаа да бараат надградба во апартмани со две спални, кои чинат 7.000-8.000 долари, или дури и во апартмани со три спални соби, чија цена се движи меѓу 10.000 и 11.000 долари за ноќ“, вели Аси.

Како резултат на зголемената побарувачка, хотелот морал да ангажира дополнителен персонал, а менаџментот е убеден дека целата оваа експанзија е директна последица на третата сезона на „Белиот лотос“.

„Тоа е 100% поради серијата. Сите сакаат да можат да кажат: ‘Престојував во сместувањето од „Белиот лотос“ пред кој било друг’“, заклучува Аси.

Тајланд станува сè попопуларна дестинација за луксузни патувања

Популарноста на Тајланд како туристичка дестинација исто така расте. Луксузната туристичка агенција Black Tomato Ltd. пријави зголемување на продажбата за 44% во првите три месеци од годинава, во споредба со истиот период лани.

Дополнително, цените на луксузните аранжмани се зголемени за околу 15%, а туристичките власти предвидуваат раст на бројот на посетители за 20% годишно.

Очигледно, „Белиот лотос“ не само што забавува милиони гледачи ширум светот, туку и буквално ја менува туристичката индустрија на Тајланд, претворајќи ја во омилена дестинација за оние кои сакаат да го доживеат луксузот од малите екрани – но во реалниот живот.