Кинескиот производител „Great Wall Motor“ ја проширува понудата на брендот „ORA“ со новиот модел „ORA 7“, а првите официјални податоци и фотографии пристигнаа преку кинеското Министерство за индустрија и информатичка технологија.

Уште на прв поглед е јасно дека ова нема да биде автомобил кој ќе остане запаметен по дискретен дизајн. „ORA“ и претходно претставуваше модели кои потсетуваат на европски класици, но „ORA 7“ оди чекор понатаму.

Две каросериски изведби со препознатлива инспирација

Новиот модел доаѓа во две каросериски верзии – како лимузина и како караван, а двете изгледаат многу познато.

Предниот дел на караванската верзија веднаш потсетува на легендарната „Volkswagen Beetle“, со ниска хауба, заоблен преден дел и кружни светла. Под нив се наоѓа тенок отвор за воздух и геометриски дизајн на браникот, што му дава ретро-футуристички изглед, пишува Autostart.

Проблемот е што ретро елементите тука не делуваат како омаж, туку повеќе како дизајнерски мозаик составен од делови преземени од различни автомобили.

Траги од „Porsche“ на секој чекор

Страничната линија дополнително го засилува тој впечаток. Формата на прозорците, високите страници и целокупниот став на каросеријата асоцираат на „Porsche Cayenne“, додека заоблените површини и благо спуштениот покрив се обидуваат да создадат помек и помодерен карактер.

Приклучокот за полнење е сместен на предниот калник, а во понудата ќе бидат достапни тркала од 18 и 19 инчи.

Лимузинската верзија е многу слична, но има подинамична линија на покривот и заден дел кој не ја крие инспирацијата од постарите генерации на „Porsche Panamera“.

Наместо голема петта врата, оваа верзија добива класичен капак на багажникот. Токму лимузината можеби најдобро покажува колку „ORA 7“ се потпира на туѓи дизајнерски референци.

Автомобилот не изгледа лошо во класична смисла, но остава впечаток дека премногу се труди истовремено да биде симпатичен, луксузен и спортски – без доволно оригиналност.

Голем електричен автомобил

Димензиите покажуваат дека станува збор за сериозен електричен автомобил.

Двете верзии имаат меѓуоскино растојание од 287 сантиметри, додека должината изнесува 482 сантиметри кај лимузината и 489 сантиметри кај караванот.

Со тоа „ORA 7“ се позиционира во повисок сегмент од помалите ретро модели по кои брендот е најпознат.

Технички карактеристики

Техничките информации засега се ограничени.

Познато е дека „ORA 7“ ќе користи литиум-железо-фосфатна батерија, но нејзиниот капацитет сè уште не е објавен.

Во понудата ќе има електромотори со 204 и 218 коњски сили, додека максималната брзина ќе достигнува до 180 километри на час.

Ќе остане ли само за кинескиот пазар?

Цената сè уште не е официјално објавена, но речиси сигурно е дека автомобилот во Кина ќе биде значително поевтин во споредба со европските стандарди.

Засега не се очекува негово пристигнување на европскиот пазар, па „ORA 7“ најверојатно ќе остане уште еден интересен пример за тоа како кинеските производители ги комбинираат познатите дизајнерски формули во потрага по сопствен идентитет.