"Nissan" ја претстави новата генерација на системот "ProPILOT" за асистенција на возачот – технологија која ветува побезбедно и порелаксирано возење во најсложените градски услови.

Попаметен од Teslа?

За време на демонстрацијата во Токио, Тецуа Ииџима, директор за развој на технологии за асистенција на возачот во "Nissan", изјави за "Auto News":

„Нашиот систем е сличен на "Full Self-Driving" на "Tesla", но можеби дури и малку попаметен.“

Тој додаде дека системот е развиен за подобро снаоѓање во тесните и пренатрупани улици на Токио, полни со пешаци.

Секако, технологија на "Tesla" веќе е комерцијално достапна, додека јавноста ќе треба да почека барем уште година и пол за системот на "Nissan", кој најпрво ќе биде достапен само на јапонскиот пазар.

За разлика од "Teslа", "Nissan" нагласува дека станува збор за систем од ниво 2 – возачот мора да ја надгледува возењето и во секој момент да биде подготвен да ја преземе контролата, пишува "Index".

Системот во Јапонија ќе биде достапен од фискалната 2027 година, а неодамна во Токио за првпат беше прикажан во реални услови.

Возење низ срцето на Токио без раце на воланот

Флота прототипови базирани на електричниот кросовер "Ariya" демонстрираше како новата технологија може самостојно да ги совладува тесните улици, крстосниците и непредвидливите ситуации со пешаци.

Возилата се опремени со вкупно 11 камери, пет радари и еден "LiDAR" сензор на покривот, кој овозможува препознавање на објекти на поголеми растојанија – дури и при повисоки брзини и ноќе.

Вештачка интелигенција што размислува како возач

Клучната разлика на новата генерација "ProPILOT" во однос на претходната е соработката со британската компанија "Wayve", чиј "AI Driver" софтвер користи напредна вештачка интелигенција.

За разлика од класичните системи кои реагираат на поединечни објекти, "Wayve AI" ја набљудува целата сообраќајна сцена. Системот разбира како се развива ситуацијата и предвидува што би можело да се случи. На тој начин се однесува како искусен и внимателен возач.

Брзината на обработка на податоци овозможува моментални реакции на ненадејни промени – од појава на пешак на премин, до изненадно кочење на возилото пред него.

Резултатот е поприродно и побезбедно возење во сложени градски услови.

Технологија што ги надминува автопатите

Претходните верзии на "ProPILOT" беа насочени кон возење на автопат – од едноставна асистенција во една лента, до "ProPILOT 2.0", кој овозможува возење без раце на патишта со повеќе ленти.

Со новата генерација, "Nissan" сака автономно возење и во градските средини.

Главниот технолошки директор на "Nissan", Еичи Акаши, истакна:

„Нашиот сегашен "ProPILOT 2.0" систем беше добро прифатен, но новата генерација носи уште понапредни можности. Таа ќе им даде на возачите чувство дека зад воланот седи вешт и доверлив човек. Системот ќе се прилагоди на посложени сообраќајни услови и ќе обезбеди поголема безбедност – не само за возачот, туку и за сите учесници во сообраќајот.“

Поглед во иднината на мобилноста

Новата генерација "ProPILOT" е дел од визијата на "Nissan" за одржлива и безбедна мобилност.

Компанијата има цел да ја зацврсти својата позиција како лидер во технологиите што овозможуваат почист, побезбеден и подостапен превоз.