Екран создаден за класици

Она што го издвојува "Pocket Air Mini" е токму екранот. Станува збор за 4,2-инчен дисплеј со резолуција од 1280×960 пиксели и фреквенција на освежување од 60 Hz.

Неговиот сооднос 4:3 совршено одговара на форматот на повеќето класични и ретро игри, што значи дека игрите ќе го исполнат целиот екран без црни рабови од страните. Дополнително, дисплејот нуди максимална осветленост од 500 нити и 123% покриеност на "sRGB" спектарот, со професионална калибрација на боите.

Хардвер и дизајн

Во внатрешноста се наоѓа "MediaTek Helio G90T", чип кој денес се смета за постар, но е повеќе од доволен за емулација на ретро наслови. Уредот е опремен со активно ладење и вентилатор, што обезбедува максимални перформанси.

"Pocket Air Mini" има компактен дизајн – широк е само 16,5 см и тежи 269 грама. За управување се користат "RGB Hall effect" џојстици и "Hall" тригери, заедно со класичните гумени "ABXY" копчиња и "D-pad". Од приклучоци располага со "USB-C", 3,5 мм влез за слушалки, слот за "microSD" картичка, а поддржува и "Wi-Fi 5" и "Bluetooth 5". Батеријата има капацитет од 4500 mAh.

Софтвер, цена и достапност

Конзолата работи на "Android 11" со адаптирано интерфејс решение на "Ayaneo", оптимизирано за ретро гејминг. Тоа овозможува брз пристап до библиотеката со игри и до најпопуларните емулатори.

"Ayaneo Pocket Air Mini" ќе биде достапен во две верзии: модел со 2+32 GB меморија по промотивна цена од 70 долари (околу 60 евра) и посилна верзија со 3+64 GB за 80 долари (околу 70 евра). Уредот ќе се нуди во три бои – "Retro White", "Aurora Black" и "Retro Power", а продажбата започнува во октомври.