Илон Маск е најбогатиот човек на светот, според „Forbes“. На 22 јануари 2025 година неговото нето богатство се проценуваше на 436 милијарди долари според индексот на милијардери на „Bloomberg“, и на 426 милијарди долари според „Forbes“. Главниот извор на неговото богатство се уделите во „Tesla, Inc.“ и „SpaceX“. Поддршката за Доналд Трамп во претседателската кампања дополнително го истакна во јавноста, особено откако Трамп освои нов мандат. Но, додека реди успеси во бизнисот, во љубовта имал многу помалку среќа.

Зад себе има два брака и дванаесет деца. Повторно ја разгоре љубопитноста околу својот приватен живот кога на инаугурацијата на Трамп се појави со Шивон Зилис – извршна директорка во неговата компанија, но и мајка на неговите три деца. Маск (53) беше виден како се дружи со Џеф Безос и неговата свршеница Лорен Санчез, како и со Иванка Трамп и Џаред Кушнер. Иако поводот беше инаугурацијата на претседателот Доналд Трамп, голем дел од вниманието се пренасочи кон Маск и Зилис, за чија врска долго се шпекулираше. Засега нема потврда дека повторно се во љубовна релација.

Додека јавноста чека одговор на оваа љубовна дилема, да се потсетиме на другите жени во животот на Маск.

Жастин Маск

Првата сопруга на Илон, Жастин Маск (поранешна Жастин Вилсон), е позната канадска пистелка. Се запознале на студии во Онтарио, а се венчале во 2000 година. На денот на венчавката, според нејзините зборови, Маск ѝ рекол: „Во овој брак, јас сум алфа.“

„Не обрнав внимание на тоа, но подоцна сфатив дека беше сериозен“, изјави Жастин. Бракот им бил исполнет со турбуленции, вклучувајќи ја и трагичната смрт на нивниот првороден син, Невада Александер, кој починал на само десет недели. Подоцна добија близнаци, а потоа и тројки, но во 2008 година се разделија.

Жастин често говорела за нивниот однос, истакнувајќи дека Маск бил целосно посветен на работата, дури и на сметка на семејството. Сепак, успеале да изградат пријателски однос за доброто на децата.

Талула Рајли

По разводот, Маск ја запозна британската актерка Талула Рајли, која подоцна стана негова втора сопруга. Нивната врска постојано го привлекуваше вниманието со бројните раскинувања и смирувања. Се свршија само две недели по запознавањето, а во 2010 година се венчаа. Две години подоцна се разведоа, но во 2013 повторно стапија во брак.

Нивниот втор брак траеше до 2016 година. Рајли го опиша Маск како човек „преполн со енергија и страст кон работата“. Иако брачната врска пропадна, останаа во добри односи.

Амбер Херд

Во 2017 година, Маск започна врска со актерката Амбер Херд, позната по своите филмски улоги и по бракот со Џони Деп. Нивната врска беше кратка, но интензивна, а парот често беше фотографиран во Лос Анџелес и Австралија.

Иако се зближија брзо, љубовната приказна заврши истата година поради професионални обврски. Маск подоцна изјави дека раскинувањето со Амбер му било особено тешко.

Грајмс

Следната значајна љубов беше канадската музичарка Клер Елиз Буше, попозната како „Grimes“. Започнаа врска во 2018 година, а во мај 2020 добија син по име X Æ A-12 – име кое веднаш предизвика светско внимание.

Подоцна добија уште едно дете со помош на сурогат мајка во 2021 година, а потоа најавија раскинување. Во септември 2023 година беше изненадувачки објавено дека добиле и трето дете.

И покрај турбулентниот однос, Маск и „Grimes“ често нагласуваа дека остануваат „најдобри пријатели“.

Наташа Бесет

По разделбата со „Grimes“, Маск кратко време беше во врска со австралиската актерка Наташа Бесет. Врската стана јавна во 2022 година, кога беа фотографирани заедно.

Бесет е позната по улогите во филмовите „Hail, Caesar!“ и „Elvis“, каде што ја толкува една од партнерките на Елвис Присли. Иако нивната врска траеше релативно кратко, јавноста ја толкуваше како обид на Маск да најде стабилност по бурните и медиумски експонирани љубови.