Станува збор за модулот „Jetson Thor“, наследник на „Jetson Orin“, со досега невидена ефикасност и можности. Потпомогнат од графичките процесори „Blackwell“ (GPU), овој систем носи повеќе од седум пати поголема пресметковна моќ за вештачка интелигенција, двојно повеќе меморија и повеќе од трипати поголема брзина и ефикасност.

Овие скокови во можностите им овозможуваат на хуманоидните роботи да обработуваат сензорски податоци, да имаат подобрено визуелно заклучување и моментална интеракција со луѓето и околината. Како што наведуваат од „Nvidia“, „Jetson Thor“ решава еден од најголемите предизвици во роботиката – да ги оживее роботите така што ќе можат да имаат интелигентни интеракции во реално време со луѓето и со физичкиот свет.

Веќе во широка примена

Според порталот „Gizmodo“, институции како Универзитетот во Цирих и „Stanford“ веќе го интегрираа „Jetson Thor“ во лаборатории и експериментални роботи. Од корпоративната страна, меѓу првите корисници се „Amazon“, „Meta“, „Caterpillar“ и „Agility Robotics“. Американскиот производител на земјоделска механизација „John Deere“ и „OpenAI“ исто така ги истражуваат можностите за примена на овој модул, особено во автоматизација и развој на роботика.

Развојниот комплет „Jetson AGX Thor“, кој вклучува модул „Jetson T5000“, матична плоча, систем за ладење и напојување, чини 3240 евра и е достапен на официјалната страница на „Nvidia“. Пакетот „Drive AGX Thor“ за автономни возила веќе е во преднарачка, а испораките се планирани за септември.

Растечката визија на „Nvidia“

Извршниот директор на компанијата, Џенсен Хуанг, предвидува дека оваа деценија ќе ја одбележат роботиката, автономните возила и машините управувани од вештачка интелигенција. Потсетуваме, „Nvidia“ порано оваа година го претстави и „Cosmos“ – пакет AI модели за обука на хуманоидни роботи.