Сигурно се сеќавате на принцезата која го остави сопругот преку Инстаграм? Тоа беше вест што одекна во светските, регионалните и домашните медиуми, а сега пристигна нова, овој пат добра вест – убавата Махра ја запросил раперот Френч Монтана.
Неговото вистинско име е Карим Харбуш и е најпознат по хитот „Unforgettable“, а запросувањето на ќерката на владетелот на Дубаи, Махра бин Мухамед бин Рашид ал Мактум (31), го потврди неговиот менаџер за ТМЗ.
Запросувањето се случило за време на Неделата на модата во Париз во јуни оваа година, набргу откако тој за прв пат прошета по модната писта.
И имал две причини за славење – успешен настап во модните води и големо „да“ од неговата поубава половина.
Инаку се шпекулираше дека раперот и принцезата се во врска од октомври минатата година, кога таа објави нивни фотографии на социјалните мрежи за време на неговиот престој во Дубаи. Дури ова лето потврдија дека се во врска, а потоа повеќе не се криеја од фотографите, кои ги „фатија“ во Париз.
Шеика Махра се најде во центарот на вниманието во јули 2024 година поради раскинувањето на бракот со шеикот Мане бин Мохамед бин Рашид бин Мане ал-Мактум и развод каков што светот никогаш порано не видел – јавно, на социјалните мрежи.
„Драг сопругу, бидејќи си зафатен со други пријателки, го објавувам нашиот развод. Се разведувам од тебе, се разведувам од тебе и се разведувам од тебе. Чувај се, твојата поранешна сопруга“, тогаш напиша Махра.
Еден месец подоцна, таа го потврди крајот на нејзиниот брак на Инстаграм, кога објави фотографија со ќерката, со порака: „Само ние две“.
Инаку Френч Монтана претходно беше во врска со Клои Кардашијан, Иги Азаела, Руби Роуз и други.
