Роверот „Perseverance“ од Марс испрати една од најдеталните панорами во својата мисија досега. Импресивниот мозаик од 360 степени, составен од 96 поединечни фотографии направени на 26 мај на локацијата Фолбрин, нуди неверојатно прецизен поглед кон пејзажот на Црвената планета, пренесува „JPL NASA“.
Благодарение на исклучително ведрото небо без прашина, тимот на мисијата успеал да сними панорама која ги прикажува ридовите оддалечени и до 65 километри.
Објавени се две верзии на мозаикот: една со подобрени бои, каде што марсовското небо изгледа сино, и друга во природни бои, со очекуваната црвенкаста нијанса на небото.
„Небото без прашина овозможува јасен поглед кон околниот терен“, изјави Џим Бел, главен истражувач на инструментот од Универзитетот во Аризона.
„Во овој конкретен мозаик го подобривме контрастот на боите за да ги нагласиме разликите меѓу теренот и небото“, додаде Бел.
„Величествените глетки како онаа во Фолбрин, забележани од нашиот ровер ’Perseverance‘, се само мал дел од она на што наскоро ќе сведочиме со сопствени очи. Револуционерните мисии на ’NASA‘, започнувајќи со ’Artemis‘, ќе започнат незапирливо патување за да го донесеме човечкото истражување на вселената до површината на Марс. ’NASA‘ продолжува да биде сè посмела и посилна“, изјави Шон Дафи, вршител на должноста администратор на „NASA“.
NASA's Perseverance Rover at 'Falbreen' on the red planet MARS
— tellme (@ankushasp) August 7, 2025
Mars is a dusty place – but every two years, the dust settles. The Perseverance rover's imaging team took advantage of this moment to capture one of the sharpest panoramas of its mission so far! pic.twitter.com/UzMvrm8gaD
„Лебдечка карпа“ и древна геологија
Посебно внимание на научниците им привлече голема карпа која изгледа како да „лебди“ на врвот од песочен бран, оддалечена околу 4,4 метри од роверот.
Геолозите сметаат дека најверојатно била донесена на денешната локација со свлечиште, вода или ветер, и тоа пред да се формира песочниот бран на кој почива. На панорамата е видлив и светол круг – трага од 43-от обид за абразија на карпа што роверот „Perseverance“ ја извршил со својата дупчалка. Оваа постапка им овозможува на научниците да го анализираат материјалот под прашливата површина пред да одлучат дали ќе земат примерок од јадрото.
Тимот е особено заинтересиран за локацијата Фолбрин, бидејќи се верува дека е едно од најстарите подрачја што роверот некогаш ги истражувал – потенцијално постаро и од самиот кратер Езеро.
Панорамата открива и траги од тркалата на роверот кои водат до претходната геолошка станица, како и јасна граница меѓу две геолошки единици. Поблиските, посветли карпи се богати со минералот оливин, додека за потемните, подалечни карпи се смета дека се значително постари и содржат глина.
Со роверот „Perseverance“ управува Лабораторијата за млазно погонство на „NASA“ („JPL“) во рамки на програмата за истражување на Марс.
Инструментот „Mastcam-Z“, клучен за снимање на овие панорами, е развиен и управуван во соработка со Универзитетот „Arizona State“ и компанијата „Malin Space Science Systems“, пренесува „Index.hr“.
