Експертите предупредуваат дека принудувањето на децата да јадат сѐ што е во нивната чинија води до нездрави ставови кон храната подоцна во животот.

Сепак, ова не е единствената родителска грешка која придонесува за дебелеење кај децата. Нутриционистката Џена Хоуп ги наведе скриените причини за дебелина кај децата, а повеќето од овие грешки можат релативно лесно да се поправат.

Сокот е скриена опасност

Многу родители веруваат дека овошните сокови им помагаат на децата да ја добијат дневната доза есенцијални витамини, но нутриционистката предупредува дека тие содржат многу шеќер, па затоа е многу подобро детето да јаде овошје отколку да пие сок.

„Децата не треба да пијат ништо друго освен вода, тоа е лесна замена. Разбирам дека соковите се вкусни и слатки, па децата често сами ги бараат, но родителите не размислуваат колку се штетни. Дефинитивно е многу подобро детето наместо да пие сок да јаде јаболко или портокал“, вели таа.

Време пред екранот

Некои родители можеби не разбираат дека постои врска помеѓу времето поминато пред екран и дебелината, но самото седење не е виновно за зголемувањето на килограмите.

Децата сѐ повеќе јадат пред екраните, што може негативно да влијае на регулирањето на апетитот. Кога детето е пред екран, неговиот мозок е фокусиран на екранот, а не на храната што ја јаде, што го прави поверојатно да изеде повеќе отколку што треба. Покрај тоа, негативно влијае на апсорпцијата на хранливите материи - мозокот не ги произведува дигестивните ензими потребни за варење бидејќи мозокот не треба да биде вклучен.

Грицки за дисциплина

Една навика која Џена ја забележала кај родителите е да им даваат на своите деца грицки и слатки само за да ги зафатат со нешто. Сепак, нутриционистката предупредува дека тоа е штетно на долг рок.

„Воспитувањето на дете не е лесно, а многу родители се постојано зафатени, правејќи неколку работи одеднаш, па честопати им даваат слатки и грицки со идеја да го окупираат детето. Пакетите со чоколадни бонбони можат да го задржат детето зафатено изненадувачки долго, но се штетни за неговото здравје“, предупредува таа, додавајќи дека децата мора да научат да се забавуваат без грицки и телефон.

Храна како награда

Повеќето родители го прават ова - ја користат храната како награда за да го натераат своето дете да направи нешто што не сака да го прави, но со тоа на своето дете му предизвикуваат долгорочни проблеми со исхраната.

„Нормално е мајките и татковците да кажат: 'Ако не го направиш ова, нема да добиеш десерт', но никогаш не треба да го правите тоа, бидејќи користењето на храната како награда создава лош однос со храната“, истакна таа.

Десерт после секој оброк

Нутриционистката вели дека е многу важно родителите да не ги учат децата дека секогаш мора да јадат десерт по секој оброк.

„Мислам дека е многу важно децата да не научат дека мора да јадат десерт после секој оброк, бидејќи во спротивно ќе пораснат верувајќи дека мора да јадат нешто благо по секој оброк, што не е во ред“, додаде таа.

Користење на количка и автомобил

Нутриционистката нагласува и дека прекумерната употреба на количка или автомобил на кратки патеки може да придонесе за зголемување на телесната тежина. Потпирањето на количка или автомобил дефинитивно придонесува за намалување на физичката активност кај децата. На децата кои веќе одат треба да им се дадат повеќе можности да ги користат стапалата, се разбира, во разумни граници.