Дали капачите имаат причина за загриженост?

Според начинот на кој беше претставена во дел од медиумите, оваа риба напаѓа во плитки води, поради што наводно најчесто се изложени на ризик децата.

Таа има исклучително силен загриз, па се предупредува дека по напад, во најтешките случаи, може да дојде дури и до ампутација на екстремитет.

Додека се создава слика за „морско чудовиште кое демне капачи“, експертите од Институтот за океанографија и рибарство во Сплит ја смируваат ситуацијата.

Дали туристите и капачите имаат причина за страв? Накратко: НЕ.

Оваа риба не напаѓа луѓе, не се нафрла врз капачи и не демне во плиткото за да ве касне.

Веројатноста воопшто да ја видите за време на обично пливање на плажа се мери во промили.

Каде најчесто се задржува оваа риба?

Пафер рибата живее на поголеми длабочини и се храни со организми од морското дно, како школки и морски ежови.

Со други зборови, туристите и капачите се целосно безбедни.

Кој навистина е загрозен?

Вистинската опасност постои, но исклучиво за две групи луѓе: риболовците и гурманите.

Овој вид во своите органи, особено во црниот дроб и јајниците, содржи тетродотоксин – исклучително моќен невротоксин кој не се уништува ниту со варење ниту со печење.

Консумирањето на оваа риба може да биде фатално.

Риболовците мора да бидат особено внимателни. Рибата има исклучително силна вилица и остри заби со кои лесно го сече најлонот, а нејзиниот загриз може да предизвика сериозни повреди.

Доколку ја уловите – не ја допирајте со голи раце.

Како стигнала во Јадранот?

Оваа риба е таканаречен лезепсиски мигрант – вид кој од Индискиот Океан стигнал во Средоземното Море преку Суецкиот Канал како последица на затоплувањето на морето, процес познат како тропикализација на Јадранот.

Иако во Грција и Турција веќе се смета за редовен жител на морето, во Јадранот сè уште е исклучително редок посетител.

Што се случи кога се појави во Егејското Море?

Пред да стигне до Јадранот, сребренолентестата пафер риба предизвика вистинска паника на грчките плажи пред неколку години.

Фотографии од Крит и Родос го преплавија интернетот, а грчките медиуми тогаш, исто како и денес дел од регионалните медиуми, пишуваа за „смртоносна наезда“.

Бидејќи Егејското Море е потопло, оваа риба таму се размножува значително побрзо отколку што некогаш би можела во постудениот Јадран.

Грчката влада и научниците веднаш презедоа конкретни мерки.

Риболовците беа обучени како да ја препознаат рибата и што да направат доколку ја уловат – никако да не ја чистат и да не ја продаваат.

Во одредени делови од Грција беа организирани акции во кои рибарите добиваа надомест за секој килограм уловена пафер риба со цел да се контролира нејзината популација.

На одредени места беа поставени информативни табли, но исклучиво за нуркачи и риболовци, а не како забрана за капење.

Сепак, и таму каде што ја има, рибата најчесто е присутна во подрачјата околу Крит и Родос.

Зошто Грците и понатаму нормално пливаат?

Иако во Грција оваа риба е неспоредливо почеста отколку во Хрватска или Црна Гора, инцидентите со капачи се исклучително ретки.

Грчките биолози повеќепати нагласиле:

„Оваа риба е плашлива. Таа не патролира низ плитките води во потрага по луѓе. Ако видите пафер риба под вода, таа ќе побегне од вас пред вие воопшто да успеете да се исплашите.“

Единствените забележани инциденти во Грција се поврзани со невнимателни риболовци кои се обидувале со раце да ја извадат рибата од јадицата, при што биле каснати од неа.

Нејзините заби се остри како клун од папагал и лесно кршат школки.

Имало и случаи на аматери кои се обиделе да ја подготват за јадење, без да знаат дека е отровна.

Треба ли да се плашите од влегување во море?

Според достапните информации и ставовите на експертите, одговорот е – не.

Пафер рибата претставува потенцијална опасност за риболовците и за оние кои би се обиделе да ја консумираат, но не и за обичните капачи.

Иако нејзиното присуство во Јадранот внимателно се следи, научниците нагласуваат дека нема причина за паника кај туристите.

Морето останува безбедно за капење, а шансите да наидете на оваа риба за време на одмор на плажа се исклучително мали.