Проценките се дека само минатата година вредноста на трансакциите на „dark web“, односно делот од интернетот кој не е достапен преку обичните пребарувачи, изнесувала најмалку 3,2 милијарди долари. Денешната интернет заедница е простор во кој нема доверба, мора внимателно да проверувате што правите, како и каде ги објавувате своите податоци, бидејќи сè може да се искористи против вас, а тоа важи и за сајбер-криминалците, кои можат да бидат фатени и да завршат во затвор, вели шефицата на службата за дигитален отпечаток во компанијата „Kaspersky“, Јулија Новикова.
Проценките се дека само минатата година вредноста на трансакциите на „dark web“, односно делот од интернетот кој не е достапен преку обичните пребарувачи, изнесувала најмалку 3,2 милијарди долари. За пристап до него се користи посебен софтвер, во некои случаи за заштита на приватноста и анонимноста, како и за комуникација меѓу новинари и укажувачи на неправилности.
Во повеќе од 50 проценти од случаите, сепак, се користи за незаконски активности, како продажба на дрога, оружје, фалсификувани документи, кражба на податоци, ангажирање хакери, но и професионални лица, па дури и проститутки. За тоа за „RTS“ зборуваше Јулија Новикова, шефица на службата за дигитален отпечаток во компанијата „Kaspersky“, или поедноставно — „ловец на хакери“ на „dark web“.
Кои опасни трендови моментално се најзастапени на „dark web“ и во апликациите?
„Постојат повеќе закани што доаѓаат од сајбер-криминалците. Од фишинг-напади до софистицирани кампањи, особено насочени кон компании, но на крај целта на сите овие активности е заработка, односно извлекување пари од поединечни корисници или компании во целина, така што монетизацијата е клучна за сајбер-криминалците.
Што е најлошото што сте го виделе на „dark web“ во текот на вашата кариера?
“Тоа е добро прашање, но би рекла дека најлошото што сум го видела во кариерата не е директно поврзано со „dark web“, туку со реакциите на корисниците, односно компаниите што се соочуваат со закани од таму. Најлошото што можат да го направат е да плаќаат откупнини на сајбер-криминалците или да губат милиони затоа што не биле подготвени или не биле свесни за заканите што доаѓаат од „dark web“.
Со оглед дека „dark web“ има и незаконска употреба, која е разликата во заштитата на комуникацијата меѓу поединци, компании и деловни податоци во споредба со стандардните комуникации?
„Би рекла дека и сајбер-криминалците денес се соочуваат со ист проблем — постои криза на доверба и во нивната комуникација. И тие мора да си веруваат меѓу себе, но денешната интернет заедница едноставно е простор без доверба. Мора да бидете свесни и да проверувате што правите, како и каде ги објавувате податоците, бидејќи сè може да се искористи против вас, а тоа важи и за сајбер-криминалците, кои можат да бидат фатени од органите на редот и да завршат во затвор.
Неодамна спроведовте истражување за апликацијата „Telegram“. Дали таа апликација е погодна за организирање незаконски активности?
„Во суштина е спротивно. „Telegram“ е популарна апликација за комуникација со повеќе функции. Сајбер-криминалците ја приспособуваат на своите потреби и успеваат да ја користат за свои активности, па затоа понекогаш може да се поврзе со платформи од „dark web“ или нешто слично. Всушност, постојат повеќе канали и комуникациски платформи што ги користат и сајбер-криминалците.
Ако земеме пример со споделување датотеки, сајбер-криминалците разменуваат фајлови меѓу себе и користат речиси исти платформи и канали како и обичните корисници, што инаку не би се сметало за ресурс на „dark web“. Тоа значи дека корисниците можат да користат нормални апликации и услуги, бидејќи „dark web“ повеќе функционира како заедница отколку како конкретна апликација или платформа.
