Група инженери и научници од водечки светски универзитети предлагаат изградба на масивна подводна бариера со цел да се забави распаѓањето на глечерот Твејтс на западниот Антарктик, познат и како „глечер на Судниот ден“.
Овој глечер придонесува за околу четири проценти од годишниот пораст на нивото на морето. Доколку целосно се урне, би можел да го зголеми глобалното ниво на морето за околу 65 сантиметри, што би изложило милиони луѓе на крајбрежни поплави.
Проектот, проценет на околу 80 милијарди долари, предвидува поставување флексибилна „подводна завеса“ прицврстена за морското дно, пренесува „Атлантик“. Таа би била висока речиси 150 метри и долга околу 80 километри, со цел да ги блокира топлите океански струи што го топат мразот оддолу. Целта не е да се запрат климатските промени, туку да се забави топењето и да се добие време додека намалувањето на емисиите не даде резултати.
Идејата доаѓа од „Проектот за закотвена завеса на морското дно“, соработка помеѓу научници, инженери и експерти за политики кои тврдат дека самото намалување на емисиите можеби не е доволно за стабилизирање на глечерите.
Во проектот учествуваат тимови од универзитетите во Кембриџ, Чикаго и Њујорк, како и други истражувачки институции. Предвидена е тригодишна фаза на истражување и тестирање, вклучително и испитувања во норвешки фјорд.
Паралелно, британски и јужнокорејски научници вршат длабински мерења под самиот глечер, со поставување инструменти на околу 1.000 метри под површината за да следат како топлата морска вода влијае врз мразот. Податоците ќе се испраќаат секојдневно преку сателит и ќе помогнат подобро да се предвиди идниот пораст на нивото на морето.
Иако планот се соочува со сериозни технички предизвици поради екстремните услови на Антарктикот, научниците сметаат дека ваквите иновативни решенија можеби ќе бидат неопходни за да се спречи драматично зголемување на нивото на светските мориња.
