Снимката што последниве денови се шири на социјалните мрежи прикажува драматично спасување на тројца патници од запалена електрична лимузина. Станува збор за моделот „Dongfeng eπ007“, а несреќата, како што потврди производителот, се случила уште на 19 март минатата година во кинеската покраина Јунан, пишува „Carscoops“.

На видеото се гледа како автомобилот по судир со камион со голема брзина губи контрола, се врти и удира во заштитна ограда. Судирот на прв поглед не изгледа особено тежок, но според наводите на производителот дошло до оштетување на батеријата, по што возилото се запалило. Од првиот удар до појавата на отворен пламен поминала помалку од една минута.

Рачките не се отвориле

Возачот веднаш излегол од возилото, но не успеал да ги отвори задните врати. Вовлечените рачки не излегле од каросеријата. Наскоро и неговата врата се затворила и повеќе не реагирала. Само половина минута по судирот густ чад почнал да излегува од автомобилот, а сите врати останале затворени.

Следувала трка со времето. Возачот се обидел да го скрши стаклото со лакт, а на помош притрчал случаен минувач. Заедно со камења ги скршиле страничните стакла и извлекле двајца патници. Во 52. секунда по судирот пламенот веќе бил видлив, а кабината целосно исполнета со црн чад. И покрај пожарот, спасен бил и третиот патник.

Тешки изгореници, но без смртни случаи

Според сведоштвото на мажот кој помогнал во спасувањето, сите тројца патници се здобиле со сериозни изгореници, но повредите не биле опасни по живот. Тој при тоа сериозно ги повредил рацете и со месеци подоцна носел завои на прстите. Поради повредите, како што навел, можно е да ја загуби работата како возач на камион.

Се појавиле и непотврдени тврдења дека едно лице загинало, но тоа официјално не е потврдено.

Реакција на производителот

„Dongfeng“ на почетокот на февруари објави соопштение во кое потврдува дека несреќата се случила во март 2025 година и наведува дека нивниот тим соработувал со надлежните служби. Компанијата истакнува дека пожарот избувнал по судир со голема брзина со камион и предупредува дека виралните снимки можеби не го прикажуваат целиот контекст на настанот.

Овој случај повторно ја отвори дебатата за дизајнот на вовлечените рачки на вратите, особено кај електричните возила. Кина во меѓувреме одлучи да ги забрани ваквите решенија кај новите модели, а по оваа снимка станува појасно зошто повторно се дава предност на класичните механички рачки.