„Mercedes-Benz“ се подготвува на 20 април 2026 година да ја претстави целосно новата електрична C-класа, што претставува голем исчекор за еден од најважните модели на оваа компанија на светско ниво.
Со децении, C-класата беше мерило во премиум сегментот од средна големина, а новата електрична верзија има за цел повторно да ги подигне очекувањата, со посилен фокус на динамиката на возење, дигиталната технологија и рафинираноста на кабината.
Изградена на наменска електрична платформа, новата „Mercedes“ C-класа е дизајнирана да понуди поангажирачко возачко искуство, а повратните информации од купувачите одиграле клучна улога во обликувањето на автомобилот, при што посебно внимание било посветено на просторот, удобноста и персонализацијата, соопштија од германскиот бренд.
Благодарение на наменската архитектура и стандардниот панорамски стаклен покрив, внатрешноста нуди значително повеќе простор од претходните генерации. Кабината е дизајнирана како потивка и попространа средина која ги спојува луксузните материјали со дигиталните функции.
Купувачите ќе можат да избираат меѓу материјали како природни влакна со отворена структура и опции од брезово дрво. Посебна новина е достапниот вегански пакет за ентериер, со што електричната C-класа станува дури втор електричен модел на „Mercedes“ со кабина сертифицирана од Веганското друштво.
Овој пакет ги опфаќа површините на седиштата, облогата на кровот, столбовите и теписите. Опционалните луксузни предни седишта вклучуваат масажа, вентилација и интеграција со „Burmester 4D“ системот за опкружувачки звук.
На технолошки план, „Mercedes“ ги нуди најновите „MBUX Hyperscreen“ и „Superscreen“ системи, каде голем визуелен елемент ја поврзува централната конзола со инструмент таблата.
Персонализацијата е дополнително засилена со десет теми на амбиентално осветлување, додека „Sky Control“ панорамскиот покрив може да создаде ефект на ѕвездено небо со 162 осветлени ѕвезди. Термичката ефикасност исто така е значително подобрена, па новиот систем за климатизација може да ја загрее кабината двојно побрзо од моделите со мотор со внатрешно согорување, користејќи половина помалку енергија благодарение на топлинска пумпа.
