Веројатно најславниот модел во историјата на „Mercedes“ е прочуената серија „W123“. Со производство што траеше од ноември 1975 година (лимузина) до јануари 1986 година (купе и караван), „W123“ со продажба од 2,7 милиони примероци стана најуспешниот модел на „Mercedes“.
По бавното зголемување на производството во првата година, купувачите кои го нарачуваа „W123“ се соочуваа со долг период на чекање од девет до 12 месеци. Се појави и црн пазар за купувачи подготвени да платат повеќе за веднаш да го добијат автомобилот, а малку користени примероци достигнуваа цена и до 5.000 германски марки над фабричката.
Како и неговите претходници, „W123“ стекна репутација на добро изработен и исклучително издржлив модел: дизел верзиите беа омилени меѓу таксистите бидејќи без проблем достигнуваа 500.000 или повеќе километри со минимални механички интервенции.
Откако ќе го достигнеше крајот на својот животен век во Европа, „W123“ често се извезуваше во Африка и земјите од третиот свет, каде што беше високо ценет поради способноста удобно да се движи по нерамни патишта и поради ретките посети на сервис. Меѓутоа, како што минуваат годините, половните „W123“ сè поретко завршуваат во Африка, а сè почесто се појавуваат во огласи како ценет производ на пазарот на половни автомобили и олдтајмери.
Добро сочуваните примероци достигнуваат астрономски цени
Дека добро сочуваните примероци достигнуваат астрономски цени, покажува примерот на „Mercedes 200 D“, понуден од холандскиот дилер „Klaas de Poel“ од Сурхјустервен. Лимузината, првпат регистрирана во септември 1982 година, долго време стоела во приватна колекција кај еден „Volvo“ дилер. Од 2016 до почетокот на 2024 година, локален колекционер го купил овој класик со 54.000 километри и со него поминал дополнителни 4.000 километри.
Потоа автомобилот сменил уште еден сопственик, пред да заврши кај „Klaas de Poel“. Сега „Mercedes 200 D“ се продава со поминати 59.654 километри. Вистински бисер, имајќи предвид дека под хаубата се наоѓа неуништлив 2,0-литарски дизел-мотор со 60 коњски сили и максимален вртежен момент од 113 Nm. Интересно е што силата се пренесува на задните тркала преку 4-степен автоматски менувач, кој дополнително ги намалува и онака скромните перформанси.
Цена на „бисерот“
Сепак, малкумина го купувале „200 D“ поради брзината и перформансите. Станува збор за удобна и економична лимузина, со 378.138 произведени примероци – втор најпродаван модел од серијата „W123“, веднаш зад верзијата „240 D“. Понудениот автомобил е во одлична состојба, со заменето масло во серво управувањето, нови гуми „Vredestein Sprint Classics“ …
Со оглед на сето наведено, не изненадува ни високата цена: 26.500 евра!
