Канали во кои е оцртан одразот на куќи стари со векови, мостови украсени со цвеќиња, а под таа прекрасна површина, неверојатна историја, наследство, култура и гастрономија. Бриж со право се смета за еден од најубавите градови во Европа и дестинација која, заедно со Гент, туристите во Белгија не треба да ја пропуштат. Во продолжение, откриваме дел од магијата што ја поседува и совети што да посетите во Бриж.

Бриж доби светска слава по филмот од 2008 година

Денес, ваквите прекрасни места тешко остануваат скриени, но Бриж влезе на светската сцена во голем стил дури и пред експлозијата на социјалните мрежи. Филмот од 2008 година, едноставно наречен „In Bruges“ (Во Бриж) беше двочасовна разгледница од овој град, со еден куп прекрасни снимки. Потоа, разбирливо, туристичките посети експлодираа и така остана до ден-денес. Повеќето посетители го посетуваат градот во лето, иако сите велат дека е најубав во пролет и есен. Меѓутоа и зимата има свој шарм, особено за време на Адвентскиот саем.

Кулата Белфорт висока 83 метри е најпознатиот симбол на градот

Бриж или Брухе? И двете се точни. Првиот е француски, вториот холандски. Градот е престолнина на белгиската покраина Западна Фландрија. Стариот градски центар има облик на јајце и е целосно под заштита на УНЕСКО. Како и многу други градови на каналите, како што е Амстердам, Бриж понекогаш се нарекува Венеција на северот.

Центаралниот дел на градот најдобро е да се истражи пеш, со лежерна прошетка која со секој направен чекор ќе открие нови детали, а тука е и импресивната архитектура. Најпознатиот симбол на градот е кулата Белфорт висока 83 метри, која нуди прекрасен поглед на покривите и каналите. Главниот плоштад, Маркт, е окружен со куќи со шарени фасади и тераси на кафулиња.

Плоштадот Маркт е срцето на градот, а плоштадот Бург е неговата душа

Иако за плоштадот Маркт се вели дека е срцето на градот, плоштадот Бург е неговата душа. Тој бил центар на моќ со векови, а денес е дом на градското собрание, сместено во готски дворец од 14 век. Плоштадот содржи згради од различни историски периоди, па прошетката низ него е како историски архитектонски водич. Најмонументалната зграда на плоштадот Бург е величествената Базилика на Светата Крв, во која се наоѓа реликвија за која се верува дека содржи капка од Христовата крв.

Историјата на каналите датира од 12 век, некогаш биле трговски патишта

Најголемата атракција на градот, секако, се каналите, а возењето по нив е искуство што не смеете да го пропуштите. Низ градот поминува мрежа од 80 канали, кои датираат од 12 век. Тие некогаш служеле како трговски патишта, поврзувајќи го Бриж со морето и благодарение на нив, градот станал еден од најбогатите трговски центри од средниот век.

Прошетка по нив или возење со брод денес открива скриени дворови, мостови и фасади што не можат да се видат од улица. Покрај пешачењето и возењето низ каналите, низ градот можете да се движите и со велосипед, а популарни се и возењата со коњски кочии.

Една од атракциите е Кнежевскиот Бегинаж „Ten Wijngaerde“, основан во 1245 година. Бил дом на Бегините, жени посветени на Бога кои ги поминувале своите денови во тишина и молитва, а денес е населен со калуѓерки од Редот на Свети Бенедикт. Бегинаж е опкружен со мирна манастирска градина и ќе им се допадне на сите што сакаат да ја почувствуваат историјата измешана со сегашноста.

Езерото на љубовта каде според легендата живееле нимфи

За допир на романтика, посетата на Миневотер или Езерото на љубовта е задолжителна. Луѓето некогаш верувале дека таму живееле нимфи, на холандски „minnen“, по што езерото го добило своето име. Таму ќе ве пречекаат дрвја, одблесок на површината на езерото, прекрасни згради на неговите брегови …

Секако, Бриж е и културен центар, со неколку импресивни музеи и галерии, од кои најпопуларен е „Gruuthusemuseum“.

Вкусете белгиско чоколадо и вафли, уживајте во белгиско пиво

Покрај тоа што е уживање за очите, Бриж нуди и бројни задоволства за непцето. Во малите занаетчиски продавници можете да вкусите белгиско чоколадо, да посетите историски пиварници, да уживате во меки вафли. Постојат неколку пиварници, а една од најпознатите е „De Halve Maan“, музеј и просторија за дегустација на пиво кое сè уште се приготвува според традиционални рецепти.

Бриж е град кој ќе ве освои, ќе ви влезе под кожа, а од каде ќе се вратите со најубави фотографии и живописни спомени. Ако ви се допаѓа адвентската врева, посетете го за време на божиќниот пазар, летото е добар избор ако не ви пречи метежот, а ако сакате да ја запознаете неговата потивка и поинтимна страна, изберете пролет или есен. Во секое време од годината, градот покажува ново, секогаш прекрасно лице.