Компанијата соопшти дека во наредните недели ќе почне да ги информира корисниците за да им овозможи избор – дали ќе се претплатат на нејзините платформи доколку сакаат да ги користат без прикажување реклами, пишува "BBC".

Корисниците од ЕУ веќе можат да платат надомест од 5,99 евра месечно за да избегнат реклами.

„Ова ќе им даде на луѓето во Велика Британија јасен избор дали нивните податоци ќе се користат за персонализирано огласување, а истовремено ќе се зачува слободниот пристап и вредноста што интернетот поддржан од реклами ја создава за луѓето, бизнисите и платформите“, соопшти "Meta".

Сепак, корисниците во Велика Британија нема да имаат опција да не плаќаат и да гледаат „помалку персонализирани“ реклами – функција која "Meta" ја додаде за корисниците во ЕУ откако регулаторите изразија загриженост.

Промени поради регулаторни притисоци

Овие промени следат откако Канцеларијата на комесарот за информации (ICO), британскиот надзорен орган за податоци, претходно годинава објави насоки за компаниите во врска со претплати без реклами.

Моделот на огласување, познат како „согласност или плаќање“, се појави како начин на кој сопствениците на дигитални платформи остваруваат приход од корисници кои одбиваат да бидат следени на нивните услуги и други страници.

Издавачите на вести се меѓу оние кои веќе го прифатија овој механизам во Велика Британија – често барајќи од корисниците да „прифатат сè“ колачиња за следење или да „одбијат и платат“.

Цени и услови на претплатата

"Meta" најави дека моделот на претплата без реклами ќе чини околу 4 евра месечно преку веб, или 8 евра месечно преку "iOS" и "Android" апликациите – при што повисоката цена треба да ја компензира провизијата што ја наплатуваат "Apple" и "Google" за трансакциите.

"ICO" го поздрави овој потег, опишувајќи го како значајна промена во досегашниот пристап на компанијата кон таргетираното огласување.

„Ова ја оддалечува "Meta" од практиката корисниците да бидат таргетирани со реклами како дел од стандардните услови за користење на "Facebook" и "Instagram", за што јасно ставивме до знаење дека не е во согласност со законите на Обединетото Кралство“, изјави портпарол на "ICO".

Преседан од судска постапка

Потсетуваме, претходно годинава технолошкиот гигант се согласи да престане со таргетирани реклами насочени кон Британка која поднесе тужба, тврдејќи дека "Facebook" системот за персонализирано огласување спаѓа во британската дефиниција за директен маркетинг, со што поединците имаат право на приговор.