Дојче Веле (DW) пишува дека ова е „премиера“ за германската Федерална служба за заштита на уставот (BfV): за прв пат еден професионалец со мигрантско потекло станува нејзин претседател.

Ова го објавија бројни медиуми, повикувајќи се на добро информирани политички кругови.

Според тие извештаи, министерот за внатрешни работи Александар Добринт од Христијанско-социјалната унија (CSU) наскоро ќе го назначи Синан Селен – за шеф на домашната разузнавачка служба.

Селен е роден во 1972 година во Истанбул, најголемиот град во Турција.

Имал четири години кога пристигнал во Германија, кај неговите родители кои работеле како новинари за ДВ.

Адвокатот кој пораснал во Келн, од 21 јануари 2019 година е потпретседател на оваа безбедносна агенција.

Кариера во безбедноста

Својата кариера ја започнал во 2000 година во Федералната канцеларија за криминалистичка полиција (БКА).

Тогаш го стекнал своето прво искуство во областа на државната безбедност, вклучувајќи ја и одговорноста за личната заштита на тогашниот канцелар Герхард Шредер и министерот за внатрешни работи Ото Шили, двајца високи функционери на Социјалдемократската партија на Германија (СПД).

Шест години подоцна, Селен преминал во Министерството за внатрешни работи во Берлин, каде што станал раководител на одделот за странски тероризам и екстремизам.

Следната негова станица, во 2009 година, била Федералната полиција, задолжена за граничната безбедност, каде што првенствено се фокусирал на борбата против тероризмот.

По враќањето во Министерството за внатрешни работи во 2012 година, тој продолжил да се занимава со борбата против меѓународниот тероризам до 2016 година – кога се случил државен удар во неговата родна Турција.

Последната негова станица пред да се приклучи на Федералната служба за заштита на уставот во 2019 година бил тригодишен „излет“ во приватниот сектор, во туристичката компанија ТУИ.

Неговата задача била да ја стандардизира безбедносната структура на целата група, со посебен акцент на сајбер безбедноста и управувањето со кризи.

Национално и меѓународно искуство

ДВ пишува дека Селен ужива добар углед во професионалните кругови и е добредојден гостин на специјализирани конференции, како што е традиционалниот безбедносен собир што неговата државна агенција редовно го организира со Сојуз за деловна безбедност (ASW).

Назначувањето на Селен доаѓа во време кога нивото на закани континуирано расте веќе неколку години: десничарски екстремизам, левичарски екстремизам, исламизам, сајбер саботажа и шпионажа.

Растечките опасности во сите области довеле до значително зајакнување на Федералната служба за заштита на Уставот – и во однос на бројот на вработени и во однос на финансирањето.

Кога станал потпретседател на „BfV“ во 2019 година, службата вработувала околу 4.000 луѓе.

Денес има над 5.000 од нив, а планираниот буџет за 2026 година, кој изнесува 686 милиони евра, треба да се зголеми за 36% во споредба со 2024 година.

Селен верува дека ова е итно потребно – особено имајќи ја предвид промената во природата на заканите од почетокот на руската агресија врз Украина.

„Нашата улога како контраразузнавачка служба станува сè поважна – како и во другите западни земји“, изјави Селен за весникот „Велт ам Зонтаг“ во август.

Сега врвен приоритет е одбраната од странски напади, по што следува борбата против тероризмот и екстремизмот.

Специјален фокус: Русија и Владимир Путин

„Забележуваме дека границите се поместуваат“, рече идниот шеф на Федералната служба за заштита на Уставот, осврнувајќи се на стратегијата на Русија под претседателот Владимир Путин.

„Повредите, па дури и смртните случаи, свесно се прифаќаат и калкулираат“.

Меѓу инструментите, како што рече тој, се „шверцување мигранти во Германија, како и влијание врз политичките одлуки“.

Како што нагласи Селен, со цел соодветно да одговори на хибридните активности на Русија, Федералната канцеларија за заштита на Уставот ги редефинирала своите приоритети преку акциски план за контрашпионажа.