На почетокот на овој месец, поротата на Флорида ја прогласи „Tesla“ делумно одговорна за сообраќајна несреќа од 2019 година, кога едно лице загина, а друго беше сериозно повредено. Несреќата се случила кога возач на „Tesla“ се наведнал по мобилен телефон што му паднал на подот додека автомобилот се движел со активиран „Autopilot“, односно технологија за асистенција при возење. Автомобилот удрил во паркирано возило, а при тоа настрадале двете лица што се наоѓале во близина.

Иако станува збор само за асистент, а одговорноста секогаш е на возачот, „Tesla“ повеќепати била мета на критики дека со името „Autopilot“ ги доведува во заблуда корисниците, кои мислат дека технологијата може целосно да го преземе управувањето со возилото.

„Autopilot“ не го предупредил возачот

Во тужбата, меѓу другото, се тврди дека технологијата во конкретниот случај не го предупредила возачот на опасноста на патот и не ги активирала сопирачките. Поради тоа, поротата ја прогласила компанијата делумно виновна и донела одлука за исплата на оштета поголема од 200 милиони долари.

Од „Tesla“ кон крајот на неделата поднеле барање до судот со кое бараат нова одлука што ќе ја ослободи компанијата од вина, ново судење или намалување на оштетата. Од компанијата на Маск тврдат дека ваквата одлука е „во спротивност со здравиот разум“ и сметаат дека вината е целосно и единствено на возачот. „Производителите на автомобили не можат да го осигураат светот од штета предизвикана од непромислени возачи“, стои во изјавата на „Tesla“.

Лажно претставување на технологијата

Со ова, секако, не се согласува Брет Шрајбер, адвокатот на жртвите. Тој на барањето на „Tesla“ гледа како на уште еден пример за непочитување на човечката загуба поради нивната неисправна технологија. Објасни дека поротата ги слушнала сите факти и врз основа на нив донела правилен заклучок – вината ја делат и возачот и „Tesla“, а клучен фактор бил токму „Autopilot“ и лажното претставување на неговите можности. Шрајбер е уверен дека судската одлука нема да се промени и дека „Tesla“ ќе мора да ја исплати одредената оштета.

Од „Tesla“ пак велат дека адвокатот на жртвите пред поротата презентирал бројни „штетни, но неважни докази“, вклучително и некои изјави на Илон Маск, додавајќи дека во суштина нема цврсти докази за вина на компанијата што би ја оправдале толку високата оштета.

Не е прв случај

Ова не е првпат „Tesla“ да се соочи со тужба поради сообраќајни несреќи во кои учествувале нивни автомобили со активиран „Autopilot“. Минатата година компанијата постигна спогодба околу несреќа од 2018 година, додека во друг случај со смртни последици, пред две години поротата донесе ослободителна пресуда за компанијата на Маск.