Кинеските производители на автомобили во Европа повеќе не се само егзотични предизвикувачи кои допрва се обидуваат да го пронајдат своето место. На еден од најголемите европски пазари веќе постигнаа резултат кој до пред само неколку години ќе звучеше речиси незамисливо – кинеските марки сега држат приближно една петтина од пазарот на нови автомобили во Велика Британија.
„Autocar“ денес пишува дека нивниот пазарен удел пораснал на околу 20 проценти, пред сè благодарение на сè поголемата понуда на електрични и хибридни автомобили, но и на агресивниот однос меѓу цената и опременоста.
Тоа значи дека повеќе не станува збор само за „BYD“, кој веќе стана познато име и меѓу европските купувачи. На британскиот пазар сè посилно настапуваат и „MG“, „Chery“, односно неговите марки „Omoda“ и „Jaecoo“, како и низа други кинески производители кои токму сега ја подготвуваат или ја прошируваат својата продажба во Европа.
Цената повеќе не е единствениот адут
Првиот бран кинески автомобили често се гледаше низ призмата на цената – нудат повеќе опрема за помалку пари. Но, ситуацијата брзо се менува. Новите модели сè почесто нудат конкурентен досег, напредни инфозабавни системи, долги гаранции и квалитет кој се приближува до етаблираните европски производители.
Токму електрифицираните модели силно го поттикнуваат овој раст. Додека традиционалните марки се борат со високите трошоци за развој на електрични автомобили и притисокот врз профитните маржи, кинеските производители зад себе имаат огромен домашен пазар, силен синџир за снабдување со батерии и можност за исклучително брз развој на нови модели.
Особено е интересно што кинескиот раст повеќе не е ограничен само на најевтиниот дел од пазарот. Производители како „BYD“ и „Denza“ сè поотворено ги таргетираат купувачите на „Volkswagen“, „BMW“, „Mercedes“ и другите традиционални европски марки.
