Поминаа 52 години од неславната смрт на Елвис Присли, а неговата погубна исхрана, преполна со пржена храна, е речиси подеднакво позната како и неговите безвременски хитови. Кога „кралот на рокенролот“ почина на само 42 години, се бореше со силна зависност од дрога, алкохол и храна – фактори за кои се верува дека придонеле за неговата прерана смрт.

Иако во шеесеттите беше симбол на привлечност, за само една деценија се здебели дури 79 килограми, што стана клучен проблем во неговиот подоцнежен живот. Присли бил познат по љубовта кон брзата храна, консумирајќи од 10.000 до 12.000 калории дневно и достигнувајќи тежина од 158 килограми во најтешкиот период од животот.

Неговите омилени јадења биле сендвичи пржени во путер и ќофтиња завиткани во сланина.

Во одредени моменти од кариерата, кога медиумите ја исмејуваа неговата дебелина и го нарекуваа „Дебелиот Елвис“, тој реши да ослабе и се впушти во екстремни експериментални диети. За време на една таква диета, внесувал само 500 калории дневно, а дополнително си инјектирал протеин добиен од урина на бремени жени, верувајќи дека тоа ќе му помогне да согори масти.

Според „Daily Mail“, анализата на неговата бизарна диета покажува до кои крајности бил подготвен да оди за да ослабе.

Присли бил голем љубител на пржената храна, но како дете немал пари за да си ја дозволи. Верувал дека појадокот е најважниот оброк во денот, па често внесувал илјадници калории уште наутро. Еден од неговите најпознати појадоци бил сендвич со путер од кикирики, банана и сланина, меѓу две парчиња леб. Според порталот „Serious Eats“, овој сендвич содржи повеќе од 1.000 калории по порција – речиси половина од препорачаниот дневен внес за мажи, кој изнесува од 2.000 до 2.500 калории.

Друг негов омилен специјалитет бил познат како „Векна на лудото злато“ – издлабена векна леб од квасно тесто, наполнета со цела тегла путер од кикирики, цела тегла џем од грозје и еден килограм сланина. Според пишувањата, Присли и неговите пријатели еднаш со приватен авион отпатувале во Денвер само за да ја купат оваа „деликатесна бомба“, при што се вратиле дома со 30 такви сендвичи.

Во својата биографија од 1960 година, „Приказната за Елвис Присли“, Џејмс Грегори детално ја документирал неговата љубов кон пржената храна.

Инјекции со протеин од урина на бремени жени

Почетокот на 1973 година го затекнал Елвис во најлошата физичка форма во животот, решен да ослабе пред концертот „Aloha from Hawaii“ и ТВ специјалот. Неговата тогашна девојка Линда Томпсон, со која беше во врска четири години, сведочи во својата книга „A Little Thing Called Love“ дека изгубил 3 – 4 килограми, но целта му била 11.

Линда за „CNN“ изјавила дека како што добивал на тежина, критиките сè повеќе го погодувале, бидејќи бил чувствителна личност.

Неговата екстремна диета вклучувала внес од само 500 калории дневно, а секојдневно му бил инјектиран протеин добиен од урина на бремени жени за согорување на мастите. Линда била „запрепастена“ што имал сила да изведе толку напорен настап со толку мал внес на храна.

Експертите предупредуваат дека ваквите екстремно нискокалорични диети можат да доведат до сериозен недостаток на витамини и минерали и до забавување на метаболизмот.

Сепак, слабеењето било краткотрајно – за само шест недели Присли ги вратил сите изгубени килограми.

Тој бил љубител и на газирани пијалаци, па се обидел да ја искористи таа навика за диета, јадејќи со недели само желе направено од неговиот омилен пијалак со вкус на црна вишна.

Во седумдесеттите пробал и со т.н. „диета на заспаната убавица“ – медицински предизвикана кома со цел да не јаде. Со помош на еден лекар од Лас Вегас, бил ставен во кома на неколку дена, но наводно паднал од болничкиот кревет, се разбудил и ја прекинал „терапијата“.

Трагичен крај

На 16 август 1977 година, Елвис Присли беше пронајден мртов во својот имот „Graceland“. Официјалната причина беше срцев удар, но многумина сметаат дека неговиот расипнички начин на живот – вклучувајќи ја и екстремната исхрана и употребата на лекови на рецепт – имале клучна улога.

Во 1973 година бил хоспитализиран поради зависност од „pethidine“, а истата година двапати се предозирал со барбитурати. Токсиколошките извештаи откриле траги од 14 различни лекови во неговиот организам, од кои 10 биле присутни во значајни количини.