„Faraday Future“, американски стартап за електрични возила познат по големите ветувања и малата испорака, го претстави новиот модел – „FX Super One“, технолошки напреден електричен миниван базиран на кинескиот модел „Wey Gaoshan“ од „Great Wall Motors“.

Новиот „FX Super One“ е осмислен како достапен семеен "MPV", но со акцент на вештачката интелигенција и дигиталните функции. Претставен е со поддршка од нови 105 милиони долари инвестиции и е наменет за глобалниот пазар.

Маска што зборува и вештачка интелигенција

Најголемата атракција е дигиталната предна маска со систем за вештачка интелигенција наречен „F.A.C.E.“ (Front AI Communication Ecosystem). Оваа маска користи препознавање на глас, светлосни сигнали и повратна комуникација за да обезбеди искуство на копилот – како да возите со дигитален сопатник. Ќе биде достапна и класична верзија на маската за поконзервативните купувачи.

Сите функции на возилото се управувани од „EAI Agent 6×4 AI“ архитектурата, која ги контролира гласовните команди, инфозабавниот систем и напредните системи за помош на возачот.

Ентериер како од научнофантастичен филм

Миниванот ќе биде достапен во конфигурации со 4, 6 или 7 седишта, додека луксузната „GOAT Edition“ нуди панорамски екран на извлекување, „Dolby Atmos“ звук и седишта со нулта гравитација обложени со еко-кожа.

Основата ја сочинува зајакнат челичен рам, додека погонот е целосно електричен со два мотора и погон на сите тркала. Подоцна ќе биде достапна и хибридна верзија со продолжен досег.

Конкурент на „Cadillac Escalade“ и „Tesla Model Y“

„FX Super One“ е долг 5,4 метри и има меѓуоскино растојание од 3,28 метри, што го става во истата лига со модели како „Cadillac Escalade“, но со повеќе простор и понапредна технологија.

„Faraday“ го промовира како возило за сите – од ѕвезди на црвениот тепих, спортисти и инфлуенсери, до обични семејства. Може да се користи како мобилно студио, канцеларија, глампинг возило или „AI вила на тркала“.

Производството започнува во 2026 година во Калифорнија, а миниванот ќе користи 50% американски делови. Цените сè уште не се објавени, но резервацијата е веќе можна со депозит од 100 долари.

„Faraday“ исто така планира и други модели под ознаките „FX4“, „FX5“ и „FX6“, вклучувајќи и ривал на „Tesla Model Y“.