На почетокот на оваа година, кинеската компанија накратко ја престигна "Tesla" и стана најголемиот светски производител на електрични возила. Иако "BYD" сè уште не е достапен за продажба во САД, компанијата успеа да изгради бренд кој е пристапен и популарен во Кина и пошироко. „Business Insider“ ја пренесува приказната за оваа компанија, која докажа дека со добра стратегија може да го надмине Илон Маск во продажбата.

Од производител на батерии до автомобилски гигант

Хемичарот Ванг Чуанфу, кого медиумите го нарекуваат „луд научник“, заедно со својот братучед ја основал "BYD" во 1995 година. Тогаш 29-годишниот Ванг потекнувал од семејство на одгледувачи на ориз. Благодарение на универзитетска стипендија, тој се преселил во посебната економска зона во Шенжен, каде што ја основал компанијата.

Според едно јужнокорејско издание, „YD“ во името потекнува од „Јадија“ – областа во Шенжен каде што првично била сместена компанијата. Буквата „B“ била додадена подоцна, наводно како маркетиншки трик. Ванг изјавил дека „BYD“ не значи ништо специфично, но подоцна ја воведе слоганот „Build Your Dreams“ (Изгради ги своите соништа). Компанијата доби и неофицијален прекар: „Bring Your Dollars“ (Донеси ги своите долари).

Првично, основниот бизнис на "BYD" бил производство на батерии за мобилни телефони. Компанијата конкурирала со веќе етаблираните јапонски добавувачи како "Toyota" и "Sony", нудејќи поевтини алтернативи. До 2002 година, гиганти како "Motorola", "Nokia", "Sony Ericsson" и "Samsung" веќе користеле батерии од "BYD".

Влез во автомобилската индустрија

"BYD" започнал да произведува автомобили откако купил пропадната државна автомобилска компанија, која била дел од одбранбената корпорација "Norinco", објави „South China Morning Post“. Првиот модел на "BYD", "F3", бил лансиран во 2005 година. Оваа компактна лимузина личела на "Toyota Corolla" и се продавала по цена од само 40.000 јуани (околу 5.850 долари).

Инвеститорот и милијардер Ворен Бафет рано пројавил интерес за "BYD". Заинтересиран за растечкото кинеско автомобилско пазар, Бафет ја посетил фабриката на "BYD". Според „Wall Street Journal“, за време на посетата, Ванг наводно испил голтка течност за батерии за да покаже колку е чиста технологијата на "BYD". Бафет бил толку импресиониран што предложил да купи 25% од компанијата.

Иако Ванг ја одбил оваа понуда, тоа не го спречило Бафет да инвестира. Во 2008 година, неговата компанија "Berkshire Hathaway" стекнала "BYD" за 232 милиони долари.

Илон Маск го исмејувал "BYD"

Во 2010 година, "BYD" го претставил своето прво целосно електрично возило – "e6". Благодарение на субвенциите од кинеската влада, "BYD" успеал да конкурира со јапонските автомобилски гиганти.

Но, не биле сите импресионирани. Во едно интервју во 2011 година, Илон Маск се насмеал кога го прашале дали "BYD" е сериозен конкурент на "Tesla":

„Го видовте ли нивниот автомобил? Мислам дека немаат добар производ. Нивната технологија не е особено напредна, а дизајнот не е привлечен.“

И покрај ова, "BYD" се позиционирал како еден од водечките производители на хибридни возила во Кина во текот на 2010-тите. Најпопуларниот модел на компанијата бил "BYD Qin", претставен во 2012 година, кој станал еден од најпродаваните автомобили во Кина.

Но, тоа не било единствениот успех на компанијата. "BYD" произведувал и хибриден "SUV"– "Tang", а соработувал и со "Daimler" (денешен Mercedes-Benz) за производство на својата "Denza" линија.

"BYD" накратко ја престигна "Tesla"

Иако поголемиот дел од продажбата на "BYD" во последниот квартал на 2023 година била во Кина, компанијата привлече глобално внимание со тоа што направи нешто што многумина го сметаа за невозможно – ја престигна "Tesla" и стана најголем светски производител на електрични автомобили.

Сега "BYD" планира да изгради фабрика во Мексико, што предизвика загриженост кај американските власти. Компанијата дури разви и сопствена флота на бродови за да ги намали трошоците за извоз. Сепак, "BYD" најави дека нема планови да ги продава своите електрични возила на американскиот пазар.

Компанијата исто така најави нови погонски склопови, кои ќе бидат вградени во две нови лимузини, од кои едната ќе биде "BYD Seal 06". Овие возила ќе можат да поминат 2.000 километри без полнење или точење гориво.

Во 2024 година, "BYD" продаде 1,76 милиони електрични возила и вкупно 4,27 милиони автомобили. Вкупниот приход на компанијата изнесувал 107 милијарди долари, додека приходот на "Tesla"бил 97,7 милијарди долари.