Се случува и на највнимателните возачи – поради брзање, стрес или бројни обврски лесно може да се превиди светлото за гориво и да се остане насред пат со празен резервоар. Но, што всушност се случува со автомобилот кога ќе остане без гориво и дали ваквата ситуација може да предизвика посериозни дефекти?
Според производителите, поновите автомобили се конструирани така што краткотрајното останување без гориво не би требало да предизвика поголеми оштетувања на моторот. Со други зборови, во повеќето случаи не би требало да дојде до сериозен дефект само затоа што резервоарот се испразнил.
Сепак, тоа не значи дека ваквата ситуација е паметно да се игнорира. Ако резервоарот целосно се испразни, постои можност низ системот да се повлечат нечистотии насобрани на дното на резервоарот. Нивната улога е да бидат задржани од филтерот за гориво, но ни тогаш не е препорачливо да се тестираат границите на системот и да се потпирате на среќа.
Кај постарите автомобили последиците можат да бидат посериозни. Во случај на возење до целосно празнење на резервоарот, поголем е ризикот од проблеми со инјекторите и пумпата за гориво, особено кај дизел моторите.
Затоа советот е едноставен – штом ќе се вклучи предупредувањето за ниско ниво на гориво, најдобро е што побрзо да застанете на најблиската бензинска пумпа и да избегнете непотребни компликации.
