Минатата година, "Toyota" продаде вкупно 1.778 возила со водородни горивни ќелии (FCEV) ширум светот. Ова претставува пад од 55,8% во споредба со 2023 година, што би можело да сугерира дека јапонскиот производител ќе се откаже од развојот на водородниот погон.

Сепак, тоа нема да се случи. "Toyota" продолжува со развојот на технологијата на горивни ќелии и штотуку ја претстави третата генерација на својот "FCEV" систем, како дел од визијата за погони на иднината.

Трета генерација горивни ќелии: Помали, полесни, поефикасни

Според "Toyota", новиот "FC" систем е помал, полесен, поиздржлив и поефикасен во однос на претходната верзија. Компанијата тврди дека е до два пати потраен, а неговата сигурност е споредлива со дизел моторите, но со предност што не бара одржување.

Покрај тоа, подобрена е и потрошувачката на гориво – патничките автомобили опремени со новиот систем ќе можат да поминат до 20% поголема дистанца со едно полнење.

За споредба, сегашниот "Toyota Mirai" има проценет максимален опсег од 647 км, додека со новиот систем може да достигне до 772 км, доколку има доволно достапни станици за полнење.

Друга клучна предност е што цената на производство е намалена, благодарение на иновативниот дизајн и подобрените процеси за изработка на горивните ќелии.

Ова би можело да доведе до пониска почетна цена како за водородните возила, така и за стационарната опрема што користи водород како извор на енергија.

Водородот се шири во индустриската употреба

Иако патничките "FCEV" возила сè уште имаат ограничена продажба, "Toyota" продолжува да ја применува оваа технологија во комерцијалниот сектор.

Нивните горивни ќелии веќе се користат во стационарни генератори, локомотиви, камиони и градежна механизација.

И покрај ограничената инфраструктура за полнење водород, оваа технологија се покажува како одржливо решение за работни средини каде што конвенционалните мотори со внатрешно согорување или електричните возила не се практични.

Дополнително, "FCEV" возилата не испуштаат штетни гасови, што ги прави идеални за употреба во еколошки чувствителни зони.

"Toyota" ја претставува новата технологија на саемот во Токио

Toyota ќе го претстави најновиот "FCEV" систем следната недела на Меѓународниот саем за водород и горивни ќелии во Токио.

Првите комерцијални модели со оваа технологија се очекуваат по 2026 година, а ќе бидат достапни во Јапонија, Европа, Северна Америка и Кина.