Чајот најчесто се споменува во позитивен контекст – како здрав и смирувачки пијалак во кој уживаме. Но, сте се запрашале ли дали вашата омилена шолја чај може да ја попречува апсорпцијата на хранливи материи? Се покажа дека некои навидум безопасни комбинации на чај и храна можат да доведат до неочекувани ефекти.

Влијае врз апсорпцијата на железо

Фармацевтката и нутриционистка, Дебра Грејсон, предупреди дека пиењето чај или кафе со намирници како црвено месо или зелен зеленчук може да ја намали апсорпцијата на железо. Железото е клучно за одржување на нивото на енергија, силен имунолошки систем и транспорт на кислород во телото.

Редовното пиење чај или кафе со оброците може да го спречи телото да апсорбира доволно железо, што може да доведе до анемија, состојба која се карактеризира со тежок дефицит на железо. Жените со редовни менструални циклуси се особено изложени на ризик од анемија поради зголемената потреба од железо. Затоа, треба да се избегнува консумирање на чај со храна богата со железо, како црвено месо, спанаќ и брокула.

Соединенија кои го блокираат железото

Некои соединенија присутни во чајот и кафето, како што се полифенолите и танините, можат да ја попречат апсорпцијата на железото.

Полифенолите, кои исто така се наоѓаат во овошјето, зеленчукот и зачините, можат да помогнат во намалувањето на воспаленијата, но исто така можат да ја попречат апсорпцијата на железото. Кон овој ефект дополнително придонесуваат танините, кои исто така се наоѓаат и во виното, како и оксалатите.