Првиот автомобил од заедничкото вложување помеѓу "Sony" и "Honda" е подготвен за производство. Сепак, за почеток ќе се продава само во Калифорнија.

"Afeela" е електричен автомобил, резултат на соработка помеѓу два јапонски гиганти од две индустрии и конечно е достапен за нарачки однапред. Беа потребни пет години за да се дојде до оваа точка.

На прес-конференција на "CES", "Sony Honda Mobility" ги објави деталите за цените и пред-нарачката за моделот "Afeela 1".

Возилото ќе биде достапно во две варијанти: "Afeela 1 Origin", која ќе чини 89.900 долари и "Afeela 1 Signature", чија цена е 102.900 долари.

Двете цени вклучуваат тригодишна претплата за различни функции во возилото, вклучувајќи систем за помош на возачот "Ниво 2+" и личен асистент со вештачка интелигенција.

Нарачките започнаа пред неколку дена, а заинтересираните купувачи кои живеат во Калифорнија можат да стават повратен депозит од 200 долари за да го резервираат своето место во редот за купување.

Сè уште не е јасно дали и кога "Afeela" ќе биде достапна во други американски држави, ниту кога ќе биде достапна ширум светот.

Досег до 500 километри

Откриени се и нови технички податоци, вклучувајќи проценет досег на "EPA" од околу 480 километри, како и вградена поддршка за "Supercharger" мрежата на "Tesla".

Испораките на поскапиот модел "Signature" ќе започнат во 2026 година, додека клиентите ќе треба да чекаат до 2027 година за поевтиниот модел "Origin".

Најновата верзија на прототипот, опишана како „речиси конечна“ од извршниот директор на "Sony Honda Mobility", Јасухиде Мизуно, сè уште изгледа како комбинација од моделите на "Tesla" и "Lucid Air", со кратки настрешници и долго меѓуоскино растојание.

Автомобилот има екрани низ целата ширина на контролната табла, 40 сензори и камери кои помагаат при полуавтономно возење, погон на сите тркала и навестувања за интегрирање на проширена реалност и „виртуелни светови“ како дел од искуството во возењето.

Како резултат на тоа, првиот влез на "Sony" во автомобилскиот сектор е дизајниран да се натпреварува со некои од најсилните играчи во сегментот на луксузни електрични возила.

Со глас го повика автомобилот на сцената

Мизуно покажа една од понапредните функции кога го повика возилото на сцената користејќи ја гласовната команда „Излези, Afeela“ преку неговиот телефон.

Тој исто така истакна дека тоа е „техничка демонстрација за оваа презентација“, така што не е сосема јасно дали гласовните команди ќе станат стандардна карактеристика во сериските модели.

Многу работи се променија откако Sony првпат го претстави својот концепт "Vision" во 2020 година: Побарувачката за електрични возила во САД вртоглаво порасна, потоа стагнираше и сега во голема мера се стабилизира.

Администрацијата на Бајден воведе дарежливи стимулации за купувачите на електрични возила, но новата администрација на Трамп може да ги укине. Покрај тоа, Кина стана водечки светски производител на електрични автомобили.

Овој последен фактор неодамна ја „турна“ "Honda" да се спои со "Nissan" со цел поуспешно да се натпреварува со кинеските автомобилски компании во сегментот на електрични возила.