Групацијата „Volkswagen“ планира најдоцна до крајот на 2029 година постепено да го згасне шпанскиот автомобилски бренд „SEAT“.
Според пишувањето на порталот „BizSrbija“, тоа би бил еден од најзначајните потези во рамките на големата програма за штедење и реструктурирање на најголемиот европски производител на автомобили.
Според извештајот на германскиот весник „WirtschaftsWoche“, раководството на „Volkswagen“ веќе го утврдило временскиот план за згаснување на брендот, а Надзорниот одбор на компанијата треба да гласа за предлогот во петок.
„SEAT“ повеќе не се наоѓа во планираната структура на групацијата „Volkswagen“ за 2030 година.
Како причина за згаснувањето се наведува потребата да се намалат сложеноста на работењето и инвестициското оптоварување во рамките на таканаречената групација „Core“, во која се вклучени „Volkswagen“, „Škoda“, „SEAT“ и „Cupra“.
Според образложението на раководството, продолжувањето на работењето на „SEAT“ (акроним од „Sociedad Española de Automóviles de Turismo“) во досегашната форма би барало дополнителни ресурси, додека компанијата сака стратешкиот развој во оваа групација првенствено да го насочи кон брендот „Cupra“.
„Volkswagen“ истовремено се соочува со силен притисок од кинеските производители на автомобили на европскиот пазар, проблеми на кинескиот пазар, како и со американските царини.
Извршниот директор Оливер Блуме се обидува преку програмата за штедење да ги намали трошоците и да го приспособи работењето на новите пазарни услови.
Одлуката за „SEAT“ доаѓа во момент кога „Volkswagen“ ја разгледува и иднината на своите фабрики во Германија.
Надзорниот одбор треба да ја разгледува долгорочната перспектива на погоните во Цвикау, Емден, Хановер и Некарсулм, како и можноста за дополнително намалување на бројот на вработени ширум светот.
