Акумулатор

Современите автомобили имаат многу сложена електроника која не престанува да работи кога ќе излезете од возилото и ќе го заклучите. Токму затоа, една од првите работи што може да се случат по подолго стоење на автомобилот е празнење на акумулаторот. Немојте да мислите дека тоа се случува само при ниски температури, бидејќи и високите температури негативно влијаат врз напонот на акумулаторот. Логично, колку е постар акумулаторот, толку е поголема веројатноста да се случи ова.

Идеално решение е да го извадите акумулаторот од возилото и да го дополните со таканаречен паметен полнач, кој денес може да се купи за навистина малку пари. Избегнувајте стартување со кабли, бидејќи тоа дополнително го скратува животниот век на акумулаторот. Специјализираните продавници имаат и уреди за мерење на состојбата на акумулаторот, па таму можете да проверите колкав капацитет му преостанува.

Одводи за дождовница

Споменатите лисја и гранки речиси сигурно можат да ги затнат одводните отвори под ветробранското стакло, кои служат за одведување на дождовницата. Последица може да биде навлегување вода во патничката кабина.

Во посериозни случаи, во кабината може да ве пречека и мувла, која освен што изгледа лошо, воопшто не е здрава. Можете да ја исчистите со сода бикарбона – измешајте вода и сода во шише со распрскувач, испрскајте ги зафатените делови, а кога течноста ќе се исуши, со сунѓер или четка отстранете ги честичките мувла од површината.

На крајот, не заборавајте да ги отпушите одводните отвори.

Гумички на бришачите

Пред употреба, внимателно одвојте ги од ветробранското стакло и исчистете ги со сува крпа. Ако се „залепиле“, најверојатно ќе се скинат при одвојувањето од стаклото, па во тој случај, секако, треба да се заменат.

Уште една работа на која треба да обрнете внимание се прскалките за миење на ветробранското стакло. Пред употреба, со игла исчистете ја нечистотијата што се насобрала во периодот додека автомобилот стоел.

Ако наместо чистење на прскалките одлучите да примените сила – односно да ја држите рачката за прскање сè додека течноста под притисок не го пробие затнувањето – постои ризик да изгори пумпата за течност. Подолго стоење, од неколку месеци, може да доведе до оксидација на пумпата и таа да престане да работи, а во тој случај единственото решение е замена.

Дискови на сопирачките

Подолгото мирување на возилото речиси сигурно ќе доведе до појава на корозија на дисковите на сопирачките. Освен што изгледа лошо, корозијата влијае и врз нивната функционалност.

Ефикасноста на сопирањето ќе биде значително намалена доколку дисковите се зафатени со корозија, па погрижете се проблемот да го решите. За време на првото возење искористете ја можноста со низа кратки сопирања да ја „исчистите“ корозијата од дисковите.

Ќе биде потребно одредено време сопирачките повторно да ја достигнат својата целосна функционалност, а во посериозни случаи на корозија постои можност да бидат оштетени и сопирачките клешти.

Ниво на течности

Пред да го стартувате автомобилот, проверете го нивото на течностите. Пред сè, станува збор за моторното масло, течноста за сопирачките и течноста за ладење.

Кога станува збор за течноста за ладење, ако недостига мала количина, доволно е резервоарот да се дополни со дестилирана вода. Недостигот од течност за сопирачките е сериозен проблем и доколку индикаторот е под минимумот, автомобилот треба да го однесете кај автомеханичар. Во таков случај сопирачките повеќе не ја извршуваат правилно својата функција и крајно неодговорно е да се вози таков автомобил.

Дури и ако нивото на течноста за сопирачките е нормално, а автомобилот стоел подолго од, на пример, шест месеци, многу е веројатно дека течноста ги загубила своите својства. Нека автомеханичар ја провери нејзината состојба, но најверојатно ќе биде потребна замена.

Ако сите течности се во нормалните граници, стартувајте го автомобилот и оставете го да работи пет до десет минути за маслото да достигне работна температура и моторот добро да се подмачка пред да започнете со возење.

Гуми

Проверете го притисокот во гумите. По подолго стоење, особено при ниски температури, шансите гумите да изгубиле притисок се многу големи. Во секој случај, наполнете ги до пропишаниот притисок на бензинска пумпа или со сопствена практична пумпа.

Пропишаниот притисок можете да го најдете на налепницата која обично се наоѓа на рамката на вратата од страната на возачот или на внатрешната страна од капачето на резервоарот за гориво. Ако не можете да ја пронајдете, проверете во упатството за употреба на автомобилот.

Подолго стоење, од неколку месеци, може да доведе и до деформација на гумите. Тоа ќе се манифестира преку постојани вибрации што ќе ги чувствувате на воланот за време на возењето. Секако, проверете ги кај вулканизер, но имајте предвид дека во таков случај единственото решение е замена на гумата – поправка нема.