Повеќето од оние кои доаѓаат да ја видат скулптурата не ја знаат нејзината приказна. Туристичкиот водич Габриела Хамонд ја раскажа таа приказна во нејзиниот авторски текст објавен на туристичкиот портал „The Wall Street Experience“. Како што напиша таа, зад овој бик се крие класична приказна за соништата во Њујорк.

„Креатор на скулптурата е Артуро Ди Модика, италијанско-американски уметник, роден на Сицилија во 1941 година. Тој почнал да се занимава со скулптура како тинејџер и се преселил во Фиренца, од каде неговата работа станала позната низ цела Италија. Како и многу други уметници пред него, во Во 1970-тите тој дошол во Њујорк. Привлечен од енергијата на градот, Модика отворил студио на улицата Гранд, денешното СоХо“, истакнала Хамонд.

Неговата работа на скулптурата на бик започнала по падот на берзата во 1987 година. Имено, Ди Модика чувствувал дека им должи нешто на Американците што го прифатиле и ја поддржале неговата скулпторска кариера.

Артуро Ди Модика со својата скулптура

„Сам плати 360.000 долари за да го создаде „Charging Bull“ (разјарениот бик). Неговата цел беше да ги инспирира луѓето да продолжат да минуваат низ тешки времиња и да ја слават истрајноста на американските деловни луѓе. Бикот беше избран да претставува „биковско“ растење на пазарот и просперитетна економија - нешто за што сите се бореа по падот на берзата“, истакна таа.

Бикот доаѓа во долниот дел на Менхетен

Скулптурата тежи повеќе од 3,1 тон и е висока 3,3 метри. Кога дошло време Ди Модика да го изложи своето големо уметничко дело, на 15 декември 1989 година, тој илегално го транспортирал и го ставил пред Њујоршката берза. Сметал дека бикот совршено ќе се вклопи под џиновската новогодишна елка на улицата Броуд, како еден вид подарок за жителите на Њујорк.

„Иако требаше да биде симбол на просперитет, Њујоршката берза не го прифати подарокот со ентузијазам. Била повикана полиција, а подоцна истиот ден (15 декември 1989 година), бикот бил преместен. Иако бил пред берзата кратко време, тој им се допаднал на жителите и побарале да се врати“, вели Хамонд.

На 21 декември 1989 година, градските власти го прифатиле барањето, враќајќи го бикот, но на нова локација, на два блока од берзата. Ди Модика ја ставил скулптурата на продажба во 2004 година, со услов купувачот никогаш да не ја премести од сегашната локација. До денес, тој останува непродаден, а творецот ги задржува авторските права за делото. Артуро Ди Модика почина на 21 февруари 2021 година на 80-годишна возраст во Виторија, Италија.