Станува збор за интервју од април оваа година, во кое Морган го прашал Бренд, кој се претставува како посветен верник, кој му е омилениот библиски стих. Неговата реакција сега предизвика бројни коментари, пишува „The Poke“.

Во меѓувреме, лондонската полиција истражува уште две пријави за силување и ги повикува сите што имаат дополнителни информации за Бренд да им се обратат.

Морган го прашал кој му е омилениот библиски стих

За време на интервјуто, Морган го прашал Бренд кој му е омилениот стих од Библијата. Бренд ја понел Библијата со себе, но по прашањето почнал да ги прелистува страниците барајќи одговор. Не успеал да наведе ниту еден стих.

Морган притоа не го прекинувал, туку молкум чекал додека Бренд ги прелистувал страниците. Токму тој момент привлече најголемо внимание откако снимката повторно почна да се споделува на интернет.

„Мислам дека никогаш не сум го видел Пирс толку долго да молчи“

Корисниците на социјалните мрежи особено ја пофалија реакцијата на Морган.

„Најдобриот момент на Пирс. Најдоброто во целата снимка е тоа што не го прекинуваше, туку практично го гледаше како самиот се заплеткува. Брилијантно. Ова е исечок што во иднина ќе се користи на обуките за новинари и водители“, напиша еден корисник.

„Страниците звучат толку ново, како штотуку да излегле од печатница“, се пошегувал друг, алудирајќи на тоа дека Бренд можеби не ја отворал често Библијата.

„Овој исечок треба да биде изложен во Лувр“, коментирал трет.

Некои особено се осврнаа на погледот на Морган кон камерата. „Најдобар е начинот на кој Пирс погледнува во камерата. Како Џим од американската серија „The Office““, напишал еден корисник.

„Мислам дека никогаш не сум го видел Пирс толку долго да молчи“, додал друг. Еден корисник се осврна и на пресудата на Бренд: „Од позитивна страна, сега пред себе има години за да го пронајде тој омилен библиски стих што толку многу го сака“.

Се огласи и Пирс Морган

Откако снимката повторно се прошири на социјалните мрежи, се огласи и самиот Морган, откривајќи што помислил за време на интервјуто.

„Се сеќавам дека тогаш си помислив: ако е толку неискрен во врска со својата наводна посветеност на Библијата, тогаш во што воопшто може да му се верува?“, порача тој.