Принцот Хари и Меган Маркл вчера за првпат се појавија заедно во јавноста откако на 26 август се вратија во Велика Британија. Нивното појавување во Нотингем не беше поврзано со должностите што ги извршуваат членовите на британското кралско семејство. Кралот Чарлс претходно оваа година нагласи дека војвотката и војводата од Сасекс нема официјално да ја претставуваат династијата, со што потврди дека одлуката донесена на самитот во Сандрингам во 2020 година и понатаму е на сила.
Принцот Хари и Меган Маркл во 2020 година одлучија да се повлечат од должностите што дотогаш ги извршуваа во рамките на кралското семејство. Сепак, нивните врски со семејството не беа трајно прекинати, бидејќи Хари, без разлика дали некому му се допаѓа тоа или не, е син на британскиот крал Чарлс Трети. Скандалите што го следеа Мегзитот и понатаму оставаат последици, како врз угледот на монархијата, така и врз семејните односи.
Извори тврдат дека Хари и Меган немаат намера да им се извинат на принцот Вилијам и Кејт Мидлтон за сите негативни зборови што ги изговориле за нив. Тоа значително го отежнува нивното јавно помирување, додека односите на Чарлс со војводата и војвотката од Сасекс донекаде се подобриле.
Додека браќата и понатаму одржуваат дистанца, Хари и Меган вчера настапија сложно. Тоа беше очекувано, но некои суптилни сигнали открија многу повеќе.
Експертот за говор на телото, д-р Бет Досон, го анализирала однесувањето на Меган Маркл и принцот Хари и истакна дека неговите чести допири може да се толкуваат на повеќе начини.
„Можно е да се обидува да ја смири, но поверојатно е дека свесно испраќа порака до јавноста. Овие допири всушност се знак на јавна поддршка“, изјави Досон.
Како што истакнала таа, Хари со своето однесување покажал дека тој и Меган се тим, што е исклучително важно. На тој начин ѝ испратил порака на јавноста дека ја поддржува својата сопруга и сè што таа прави.
„Повеќе станува збор за солидарност отколку за потреба да ја утеши“, додаде таа, нагласувајќи дека принцот делувал понапнато од својата сопруга: „Не мислам дека таа беше нервозна, тој беше“.
За време на средбата со граѓаните, познатиот пар примаше подароци, се фотографираше со присутните и накратко разговараше со нив. Меган во таа прилика двапати се бакна со 90-годишната Ајрин Хардман, која ѝ покажа врамена фотографија од нивната средба во 2017 година, кога војвотката со Хари го посетила Нотингем.
„О, Боже, ова е толку слатко. Изгледате прекрасно, ги обожавам вашите чевли“, ѝ рече американската актерка.
Досон го анализирала и однесувањето на Меган Маркл за време на разговорите со присутните.
„Делува многу опуштено во непосредниот контакт со луѓето. Се врти кон нив и стои блиску додека се фотографираат, бидејќи знае дека на тој начин остава впечаток на топлина и пристапност“.
„Меган разбира колку е важно секој човек да се чувствува ценет, а тоа го постигнува со насмевки, ракување и интимен пристап. Таа е обучена актерка и знае како да ги контролира изразите на лицето и гестовите, но тоа не значи дека нејзиното однесување е неискрено“, наведе таа.
Заклучокот е дека Меган е посмирена и повешта во комуникацијата со јавноста, додека Хари е значително понапнат, но и многу решен да му покаже на светот колку тој и неговата сопруга се хармоничен пар. Принцот неодамна јавно зборуваше за тоа дека порано доживувал напади на паника поради јавните настапи. Кога вчерашното нивно појавување ќе се разгледа од тој аспект, неговата нервоза можеби била и неизбежна.
