Далеку од кралските протоколи и лондонската врева, 40-годишната претприемачка заедно со сопругот Сем Катмор-Скот и нивните три деца го пронашла своето парче рај на Маврициус.

Челси Дејви ретко ја отвора вратата кон својот приватен живот, но деновиве на своите следбеници на Инстаграм им овозможи мал увид во семејното секојдневие на тропскиот остров. Имено таа објави фотографија од четиригодишниот син Лео и двегодишната ќерка Клои како трчаат по пристаништето кон блескавото сино море, пишува „Daily Mail“.

Сцената совршено го доловува животот што денес го води поранешната девојка на принцот Хари. Челси и нејзиниот сопруг, хотелиерот Сем Катмор-Скот, се родители на три деца, а во март оваа година го добија најмладиот син Фин.

Минатиот декември семејството одлучило да се пресели на Маврициус и таму да го поминува поголемиот дел од времето, откако претходно живееле на релација меѓу Чизик во западен Лондон и Норфолк.

Маврициус ѝ е втор дом уште од детството

Тропскиот остров не е случаен избор за Челси. Таа го посетува речиси секоја година уште од својата четиригодишна возраст, а токму Маврициус е местото каде што се случил еден од најважните моменти во нејзиниот живот.

Челси и Сем се венчале во 2022 година на опуштена церемонија на плажа во хотелот „Paradis Beachcomber“. Венчавката била толку дискретна што, според тогашните извештаи на британските медиуми, за неа знаел само многу тесен круг луѓе.

Исто така се одлучила за едноставна венчаница, односно бел фустан во бохо стил со исечоци, кој, како што подоцна открила, го купила во хотелскиот бутик само еден ден пред венчавката. Младоженецот го следел лежерниот островски кодекс на облекување, носејќи темносина ленена кошула и бели кратки панталони.

Челси минатиот месец покажа и како изгледа балансирањето меѓу мајчинството и водењето сопствен бизнис. Таа објави снимки зад сцената од фотосесија за својот бренд за луксузен накит „Aya“, а во кадрите се појавија и нејзините деца.

Облечена во кратки панталони и бела ленена кошула, таа го надгледувала снимањето, додека во еден момент малиот Фин бил прицврстен во носилка на нејзините гради.

Особено симпатичен момент му припаднал на Лео, кој на следбениците им најавил како изгледа еден ден на неговата мајка додека го води својот бизнис од Маврициус. Тој покажал и дел од нивната семејна рутина – од утринските прошетки и појадокот до одењето на училиште, вечерата и заспивањето.

Челси претходно признала дека истовременото одгледување три деца и водењето бренд понекогаш наликува на „џунгла“, но нагласила дека токму таквиот живот самата го избрала.

Пред да го основа брендот за накит, таа направила голем пресврт во кариерата. По професија е правничка и работела во лондонскиот Сити, но ја напуштила правната кариера за да му се посвети на претприемништвото и на својата љубов кон накитот инспириран од Африка.

Интересно е што Катмор-Скот не е целосен странец во круговите во кои некогаш се движел принцот Хари. Тој го посетувал Итон една година пред Хари, а денес е директор на семејниот хотел „The Harper“ во Норфолк.

Неговиот брат е актерот Џек Катмор-Скот, познат по филмот „Tenet“ на Кристофер Нолан и серијата „Deception“.

Сепак, Челси денес изградила живот кој е прилично далеку од интензивното медиумско внимание што ја следеше за време на врската со британскиот принц. Челси и Хари ја започнале врската во 2004 година, за време на неговиот престој во Зимбабве, земјата во која таа пораснала. Нивната врска, обележана со раскинувања и помирувања, траела околу седум години.

Врската во еден период била толку сериозна што Челси станала дел од кралскиот круг на Хари. Таа присуствувала на венчавката на Питер Филипс и Отам Кели, каде што ја запознала кралицата Елизабета Втора, како и на прославата на 60-тиот роденден на тогашниот принц Чарлс.

Сепак, оддалеченоста, различните животни патишта и притисокот што го носел животот покрај член на кралското семејство го направиле своето, па тие конечно се разделиле во 2011 година.

Останале во добри односи, што го потврди и нејзиното присуство на венчавката на Хари и Меган Маркл во 2018 година.

Судејќи според сè, Челси денес очигледно ужива во сосема поинаквото секојдневие. Трите деца, сопругот, сопствениот бизнис и животот покрај Индискиот Океан ги заменија кралските настани и лондонските забави, а ретките моменти што ги споделува укажуваат дека ваквиот избор навистина ѝ одговара.