„Мател“ претстави кукла инспирирана од култниот изглед на пејачката од спотот за „I Wanna Dance with Somebody“.
Пејачката Витни Хјустон ја доби својата прва Барби кукла, изработена по примерот на еден од најпрепознатливите изгледи на славната пејачка.
Куклата беше претставена на 9 август, на денот кога Витни ќе наполнеше 63 години, а нејзиниот изглед потсетува на изданието на пејачката од спотот за хитот „I Wanna Dance with Somebody“ од 1987 година. Барбиката носи реплика на виолетовиот фустан што Витни го носела во спотот, со шарени висечки обетки и препознатлива впечатлива шминка, а во комплетот има и држач за микрофон.
Како што наведуваат од „Мател“, оваа кукла ги слави Витни и нејзината „кариера која соборуваше рекорди, нејзиното наследство и безвременската музика што инспирираше генерации уметници и која и понатаму допира до публиката ширум светот“.
Куклата е создадена во соработка со Пет Хјустон, снаата на Витни и извршна управителка на нејзиното наследство, која откри дека идејата за кукла посветена на славната пејачка се појавила уште пред повеќе децении.
„Витни никогаш навистина не поддржуваше нешто од тој тип, но почнавме да разговараме за нејзиниот бренд… За кукла на „Мател“ разговаравме уште пред 20 години“, изјави Пет за „Пипл“.
Витни, која почина во 2012 година на 48-годишна возраст, првично била заинтересирана за кукла инспирирана од нејзиниот филм „Телохранител“ од 1992 година и придружниот саундтрак-албум од филмот. Иако тој проект тогаш не бил реализиран, Пет рекла дека Витни „навистина сакала да посвети време на изработката на куклата“.
„Многу сум среќна што сега гледаме како оваа кукла конечно станува реалност и што ќе остане како трајно влијание врз генерациите што доаѓаат. Почестена сум што сум тука во овој момент и што конечно го реализираме ова“, додала таа.
Пет истакнала дека ѝ било „чест“ да соработува со „Мател“ во создавањето на првата Барби кукла посветена на Витни.
„Видов колку внимание, креативност и посветеност вложија во славењето на наследството на Витни. Сето тоа го направи ова искуство многу значајно и многу сум благодарна што бев дел од проект кој ги слави нејзината уметност, елеганција и влијанието што таа и понатаму го има врз светот“, заклучила Пет.
Од бројните култни песни и моменти од кариерата на Витни, Пет и тимот на компанијата „Мател“ одлучија посебно внимание да ѝ посветат токму на песната „I Wanna Dance with Somebody“, која се смета за една од најголемите поп-песни на сите времиња.
Со оглед на силната лична поврзаност што публиката ја има со оваа песна, Пет сметала дека изборот бил сосема логичен.
Според нејзините зборови, „Мател“ посветил посебно внимание на секој детаљ од куклата за што поверно да го долови изгледот на Витни од видеоспотот.
Денес
