Овие ADDW системи од 2024 година беа задолжителни за новите модели што тогаш беа пуштени во продажба, а сега нивната вградување станува обврска за сите нови возила што првпат се регистрираат на пазарот на Европската Унија, пишува „Autostart“.

Следењето на возачот станува стандард

Во пракса, тоа значи дека вградувањето камера или инфрацрвен сензор во внатрешноста на возилото сега е законска обврска. За разлика од досегашните системи, овој не е насочен кон следење на патот, туку исклучиво кон возачот.

Системот ја анализира положбата на главата, насоката на погледот и движењето на очите, за да утврди дали возачот предолго гледа во мобилниот телефон, екранот на инфозабавниот систем, инструмент-таблата или на друго место наместо кон патот. Доколку процени дека вниманието на возачот е предолго одвлечено од возењето, автомобилот мора да активира звучно и визуелно предупредување.

Строги правила и јасно дефинирани прагови

Европската регулатива е многу прецизна. При брзини од 20 до 50 km/h, системот мора да реагира ако погледот на возачот е насочен надвор од зоната на патот повеќе од шест секунди. Над 50 km/h, критериумите се уште построги, па предупредувањето може да се активира веќе по околу 3,5 секунди.

Европската комисија овие мерки ги темели на проценките дека невниманието на возачите е една од главните причини за голем број сообраќајни несреќи, поради што се очекува новите системи да придонесат за намалување на бројот на загинати и повредени лица.

Разлика во однос на постојните системи

Важно е да се нагласи дека новите системи значително се разликуваат од оние на кои возачите веќе се навикнати. Голем број автомобили со години имаат функција за предупредување за замор, но таа најчесто функционираше според едноставен принцип – препознавање на движење во рамките на сообраќајната лента, нагли движења на воланот или следење на времетраењето на возењето без пауза.

Новите системи одат чекор понатаму, бидејќи директно го следат однесувањето на возачот, што им овозможува побрзо и попрецизно да реагираат. Токму тука, сепак, се појавуваат и најголемите дилеми.

Дилеми кај возачите: Цена, приватност и постојани предупредувања

Првата дилема е од практична природа. Возачите веќе се жалат дека модерните автомобили пречесто испуштаат звучни предупредувања, понекогаш и без очигледна причина. Постои страв дека системот може да стане иритантен ако, на пример, погрешно го протолкува погледот кон ретровизорот или прилагодувањето на клима-уредот како губење на вниманието.

Втората дилема се однесува на цената, бидејќи секој нов задолжителен електронски систем ги прави автомобилите поскапи и покомплексни.

Третата, а воедно и најчувствителната, е прашањето за приватноста. Иако европските правила налагаат системот да функционира како затворена целина, без испраќање податоци надвор од возилото, многу купувачи стравуваат дека снимките од нивното лице, движењата на очите и возачките навики би можеле да бидат зачувувани, анализирани или искористени за комерцијални цели.

Поширок пакет безбедносни мерки

Покрај системот за следење на вниманието на возачот, новата фаза од регулативата воведува и други задолжителни безбедносни технологии.

Сите нови автомобили и комбиња мора да бидат опремени со унапредени системи за автоматско сопирање во итни ситуации, кои препознаваат пешаци и велосипедисти.

Воведени се и дополнителни барања поврзани со заштитата на пешаците при удар од возило, како и нови тестирања што го оценуваат однесувањето на автомобилите со истрошени гуми.

Сето тоа е дел од пошироката европска стратегија за намалување на бројот на жртви во сообраќајот.