Европските производители на автомобили забрзано губат уште една предност во однос на кинеската конкуренција, овој пат кога станува збор за трошоците за поправки и осигурување. Најновата анализа на германскиот Центар за автомобилска технологија на „Allianz“ (AZT) покажува дека разликата меѓу европските и кинеските модели драстично се намалила за само две години.
Во 2024 година европските автомобили во просек биле класифицирани за три осигурителни категории поповолно од кинеските. До 2026 година таа разлика се намалила на само една категорија, што покажува колку брзо кинеските производители ја стигнуваат конкуренцијата.
Според Кристијан Зар, директор на технолошкиот центар на „Allianz“, кинеските производители ја подобриле својата просечна класификација за 1,5 категории, додека европските во истиот период назадувале за половина категорија.
Причината е сè посериозниот пристап на кинеските компании кон европскиот пазар. Производителите како „BYD“ и „MG“ ги прошируваат сервисните мрежи, вложуваат во магацини за резервни делови и обука на механичари, додека некои уште при развојот на автомобилите водат сметка за тоа колку едноставно ќе можат да се поправаат.
Европските производители, од друга страна, се соочуваат со сè поголемата сложеност на современите автомобили. Дури и помал удар денес може да бара замена на сензори, камери или радари, како и дополнителна калибрација на електронските системи, што значително ги зголемува трошоците за поправка.
Сепак, кинеските автомобили сè уште не ги достигнале целосно европските кога станува збор за долгорочната поддршка. Достапноста на резервните делови се разликува меѓу марките, а се поставува и прашањето колку долго одделни кинески производители ќе останат присутни на европскиот пазар.
Затоа анализата на „Allianz“ не значи дека кинеските автомобили веќе се поевтини за поправка од европските. Осигурителните категории земаат предвид повеќе фактори, вклучувајќи ги зачестеноста и трошоците на штетите. Она што резултатите јасно го покажуваат е дека предноста на традиционалните европски производители брзо се намалува.
