Доаѓа зима, па не е лошо да се потсетиме на советите за одржување на возилата, што ја вклучува и способноста на возачите да ги препознаваат сигналните светилки и да реагираат во согласност со евентуалните предупредувања.

Затоа ве прашуваме – дали ги познавате сите симболи и светилки на инструмент-таблата?

Истражување што неодамна го спроведе страницата „Confused“ покажува дека најпрепознатливата икона на инструмент-таблата е знакот за ниско ниво на гориво во резервоарот, кој го препознале 91 процент од испитаниците.

Меѓутоа, изненадува тоа што 35 проценти од испитаниците не го препознале знакот за системот „ABS“, 32 проценти не го препознале симболот за низок притисок во гумите, а 29 проценти не го препознале индикаторот за воздушно перниче.

Што значат овие светилки и како да реагирате?

Светилката со ознаката „ABS“ предупредува на неисправност во системот што го спречува блокирањето на тркалата при сопирање. Основното сопирање обично останува функционално, но без помошта од овој систем, па возилото треба да се провери што поскоро. Ако истовремено свети и предупредувањето за сопирачките, проблемот може да биде посериозен и бара итна проверка.

Симболот што наликува на пресек од гума со извичник предупредува на недоволен притисок во една или повеќе гуми. Намалете ја брзината, запрете на безбедно место и проверете ги. Притисокот треба да се приспособи според вредностите што ги пропишал производителот, наведени на налепницата на возилото. Во студените месеци оваа проверка е особено важна, бидејќи пониските температури можат да го намалат притисокот во гумите.

Предупредувањето за воздушното перниче, пак, укажува на неисправност ако остане вклучено или продолжи да трепка по стартувањето на возилото. Во таков случај е потребна сервисна проверка што поскоро. Краткото палење при вклучувањето на возилото може да биде дел од вообичаената проверка на системот. 

Изгледот и значењето на предупредувањата можат да се разликуваат меѓу моделите. Затоа, најсигурен извор е упатството за конкретното возило, во кое е објаснето и дали можете да продолжите со возењето или треба веднаш да запрете.