На подфорумот „r/voiture“ на „Reddit“, кој собира автомобилски ентузијасти, беше објавен несекојдневен проект за пренамена на паметна нослива технологија во функција што никогаш претходно ја немала.

Авторот ги споделил деталите од „DIY“ проектот, во кој успешно ја надградил внатрешноста на својот „Audi B5“ од 2001 година.

Тој искористил паметен часовник „TicWatch“, кој практично бил предодреден за електронски отпад, па решил да му даде сосема нова улога во кабината — го вградил директно во рачката на менувачот.

Паметна рачка за менувач

Со помош на 3D печатач изработил прилагодено куќиште со кое кружниот часовник совршено се вклопил во постојната рачка.

Освен тоа, со таканаречено „vibe coding“ изработил и сопствена „WearOS“ апликација, која ги користи вградениот акцелерометар и жироскоп на паметниот часовник за да го чита аголот под кој се наоѓа рачката на менувачот.

Врз основа на тие податоци, екранот на часовникот прикажува во која брзина моментално се наоѓа менувачот.

Најголемиот технички предизвик со кој се соочил за време на развојот бил возењето по нагорнини и надолнини.

Косината на теренот, како што вели, ги нарушувал отчитувањата на сензорите, поради што системот прикажувал случајни и неточни степени на пренос.

За да го реши овој проблем, авторот морал во алгоритмот да вгради динамична калибрација, која ѝ овозможува на апликацијата да ги приспособува податоците и да ги коригира грешките во реално време за време на возењето.

Попрактично решение од фабричките системи

Ваквото „хакирано“ решение се покажало и попрактично од стандардните методи.

Имено, комуникацискиот протокол во стариот „Audi B5“ е исклучително ограничен кога станува збор за податоците за степените на пренос.

Поради тоа, изработката на сопствена апликација базирана на акцелерометар била значително поедноставна опција отколку обидот потребните информации директно да се извлечат од компјутерот на автомобилот.

Невидливи контроли на допир

По успешното мапирање на менувачот, авторот го подигнал проектот на уште повисоко ниво со интеграција на невидлив контролер за „Spotify“.

Користејќи го екранот чувствителен на допир на паметниот часовник, овозможил управување со музиката преку едноставни гестови на екранот, додека раката на возачот веќе се наоѓа на менувачот.

На пример, со движење на прстот нагоре се прескокнува песна, со движење надолу се враќа претходната, додека со допир на екранот музиката привремено се паузира.

Притоа, интерфејсот на часовникот — односно менувачот — видливо не се менува, па контролата за „Spotify“ всушност е скриена „под хаубата“.

Меѓу промените на степените на пренос, екранот на часовникот преку „Bluetooth“ врска прикажува информации за песната што моментално се репродуцира.

Оваа модификација ја елиминира потребата од дополнителни копчиња во кабината или држачи за мобилен телефон, а притоа возачот не мора ниту да го тргне погледот од патот, бидејќи контролите за музика се наоѓаат токму таму каде што раката природно стои за време на возењето.

Како сето тоа функционира во пракса, може да се види во оригиналното видео објавено од авторот.