Островот Ханс се наоѓа на половина пат помеѓу Гренланд и канадскиот остров Елесмер, а „војната“ што се водела околу него не вклучувала оружје, туку само знамиња и шишиња со добро виски и ракија!

Седумдесеттите растел интересот за Арктикот, но прашањето кому припаѓа островот Ханс не е решено

Во седумдесеттите години на минатиот век, научниот интерес за Арктикот нагло растел, пишува Регионалниот информативен центар на ОН, особено околу стратешки важниот Северозападен премин. Островот Ханс, сместен приближно 18 километри од Канада и Гренланд, според меѓународното право можел да припадне на која било од двете држави.

Иако Канада прва ја истакнала својата претензија, Данска ја оспорила, па во 1973 година двете земји потпишале договор. Со него било договорено дека морската граница ќе се прекине на линијата на ниската плима од едната страна на островот и ќе продолжи од другата, оставајќи го прашањето за суверенитетот над островот Ханс нерешено. Двете страни се согласиле дека ќе се вратат на ова прашање во иднина.

Како започнала „виски војната“ на камениот остров?

Недолго по тој договор, со кој ништо не било решено, започнало „препукувањето“. Прво, во 1984 година, Канада на островот поставила свое знаме и оставила шише канадско виски како симболичен гест на полагање права.

Како одговор, данскиот министер за прашања на Гренланд го посетил островот, ги заменил канадските знамиња со дански и оставил шише данска ракија со порака: „Добредојдовте на данскиот остров.“ И така, пишува „BBC“, започнала „војната со виски“, една од најнеобичните во поновата историја.

Симболичната игра траела сè до 2005 година

Во следните две децении, двете земји учествувале во пријателски ритуал: ги отстранувале знамињата на другата страна и оставале шише национален алкохолен пијалак. Оваа симболична игра траела до 2005 година, кога двете држави признале дека е потребно да се најде подолгорочно решение. Иако островот Ханс немал значајни минерални ресурси, имал стратешко значење, а двете земји препознале дека е ризично да се остави неговото прашање отворено.

На потпишувањето на договорот министрите донеле виски и ракија

Во јуни 2022 година, Данска и Канада потпишале официјален договор во Отава, со што „Војната со виски“ официјално завршила. Во чест на долгогодишната традиција, канадската министеркa за надворешни работи и данскиот министер за надворешни работи размениле шишиња виски и ракија. Двете држави се договориле островот Ханс да го поделат приближно на половина, во насока север–југ, следејќи го неговиот природен гребен.

Војната со виски завршила без жртви, употреба на оружје и без груби потези. Островот Ханс станал единственото место каде Канада и Данска имаат копнена граница, а иако е ненаселен и мал, преку него минале бројни државници, војници и претставници на властите од двете страни. Симбол на судирот, како и на постигнатото решение, останале традиционалните алкохолни пијалаци: виски и ракија.