Италијанскиот филм „Животот е убав“ од 1997 година остана длабоко запишан во сеќавањето на гледачите ширум светот. Режијата и актерската игра на Роберто Бенињи, заедно со потресната приказна сместена во времето на Втората светска војна, го направија овој филм едно од најомилените остварувања во историјата на кинематографијата.
Меѓу најемотивните елементи на филмот сигурно е ликот на малиот Џозуе, кој го освои срцето на публиката. Улогата на ова мало момче ја толкуваше Џорџо Кантарини.
Патот од дете-актер до зрел уметник
Кантарини, роден 1992 година во Орвието, пораснал во мирно селско опкружување северно од Рим. Иако како дете сонувал за фудбалска кариера, неговите планови се промениле кога зачекорил во полнолетство, одлучувајќи да се посвети на актерството.
Во разговор за „El Mundo“ открил дека сите овие години останал во контакт со Роберто Бенињи. Кога не успеал да ги оствари своите фудбалски амбиции, го послушал советот на Бенињи и се запишал на Експерименталниот центар за кинематографија во Рим, каде дипломирал во 2014 година.
Првите чекори во филмскиот свет
Како седумгодишно дете во култното остварување, Кантарини ја игра улогата на синот на Гвидо — централна точка на филмот кој се занимава со односот татко–дете во најтемните моменти на историјата. За да му ја приближат приказната за Холокаустот, режисерите едноставно му објасниле дека станува збор за судир помеѓу „добрите и лошите луѓе“, водејќи сметка за неговата возраст.
Успехот на италијанскиот филм му ги отвори вратите и кон меѓународни проекти, па така во 2000 година се појави во „Гладијатор“, каде ја толкуваше улогата на синот на главниот херој Максимус, кого го игра Расел Кроу.
Понатамошен професионален развој и нови проекти
Во следните години, Кантарини сè повеќе се посветувал на образованието и професионалното усовршување.
„Студирав еден месец на Филмската академија во Њујорк и се чувствував како дома. Веќе имам контакти со американски продуцент и режисер“, рекол тој за „El Mundo“.
Во 2022 година се нашол во уште една поголема продукција — биографската драма „Ламборџини: Човекот зад легендата“, филм за подемот на Феручо Ламборџини и неговиот придонес во авто-индустријата.
Приватен живот и сегашни активности
На социјалните мрежи често споделува фотографии со својата партнерка, италијанската актерка Маријал Бајма-Рива. Во моментов живее на релација помеѓу Њујорк, Италија и Франција. Иако не е во центарот на големите филмски студија, активно работи во театар, а се занимава и со пишување и режија на помали проекти.
Наследството на филмот „Животот е убав“
Да потсетиме, ова култно остварување во 1999 година освои три Оскари — за најдобар филм на странски јазик, главна машка улога и музика. Година дена претходно, во Кан, филмот беше награден со престижниот „Гран при“ како најдобро остварување на фестивалот.
